1643
1. Adr: Maria Balccia – Aut: Laurentius Ludenius (Pijs manibus /.../ Mariae, /.../ Jacobi Balccii, in /.../ Dorpatensium rep. senatoris /.../ filiolae, 29. Maji anno 1643. /.../ denatae; et 4. die mensis sequentis Junij, Dorpati in sepulchro, quod est in aede D. Johanni quondam sacra /.../ illatae; consecratum a condolentibus amicis. – Dorpati Livonorum, 1643: Lit. acad.) UUB (def), [Tartu UB]
EPICEDIUM
Per Anag.
AMABILI CARA.
Vt fontis liquidi cepi miranda lavacra,
Accepique Infans undamque Auramque salubrem;
En tum praeteritas maculas in flumine lavi,
CARAque succrevi ceu plantula AMABILI Olympo.
5 Ut primam fando potui formare loquelam
Et tenera incepi modulari carmina voce,
Carmina Coelestem nostrum resonantia CHRISTVM,
CARA ego succrevi ceu Plantula AMABILI Olympo.
In me jam Pater et Mater cum prole latentes
10 Adderet igniculos Virtutum et semina Veri;
CARA ego succrevi ceu Filia utrique parenti.
Vincit amor CHRISTI, primisque invitat ab annis
Me sibi dilectam succedere AMABILI Olympo;
Longaevo occludo nictantia lumina somno;
15 Atque Anima o coeli nitidissima templa subintrat,
Cum Christo in dulci flagrando vivit et aura.
Salve, chare Pater, Salve, charissima Mater,
CARA ego succrevi ceu plantula AMABILI Olympo.
Quod cond. ap.
et J.U.D. Prof. et p.t. R. M.
2. Adr: Maria Balccia – Aut: Johannes Erici Stregnensis (cf. 1)
UUB (def), [Tartu UB]
EPICEDIUM
Felices Pueri liquido de fonte renati,
Si placido pergant succubuisse die.
Lavere antiquas maculas in flumine puro,
Ereptique malis coelica tecta tenent.
5 Et tua, Vir praestans BALCCI, carissima Gnata
Hac multum felix conditione manet.
Deposuit primas maculas in flumine: Christo
In vita et morte est consociata suo.
M. JOHANNES ERICI STREGNENSIS,
Astronom. et Phys. P. P.
3. Adr: Maria Balccia – Aut: Johannes Georgii Gezelius (cf. 1)UUB (def), [Tartu UB]
EPICEDIUM
Parvula nunc parva MARIA reconditur urna
Filia, Matris amor, deliciumque Patris,
Quam binos in mundo annos vix vita manebat,
Magna tamen Matri spes fuit atque Patri.
5 Clotho sed infelix Patris facit irrita <vota>,
Delicias Matris sustulit una dies.
Sustulit una dies vitam fragilem, inde diebus
Omnibus in coelo gaudet ovatque Deo.
Gaudet ovatque Deo, cui jam nova cantica cantat,
10 Dum pia progenies vivit in axe Poli.
Hinc bene, chare Parens, patrium moderere dolorem
Immodicum; Mater, flebile siste melos;
Sic Domino placuit, qui nubila tempora Brumae
Noxia cum teneris floribus esse videt.
15 Vernantes transfert subito in coeleste rosetum,
Ne noceant venti, ne fera laedat hyems.
Sic flos hic roseus coeli nunc floret in horto,
Vivit in aethereo flos pretiosus agro.
Perpetuo Domino fragrantem spargit odorem,
20 Dum manet in coelo Plantula grata Deo.
In terrae gremio tumulantur membra tenella,
Quae surgent multis glorificata modis.
Condolentiae Ergo scr.t
Graecae et Orient. Ling. Prof. P.
4. Adr: Maria Balccia – Aut: Andreas Sandhagen (cf. 1) UUB (def), [Tartu UB]
EPICEDIUM
Qvid faciat tristes vultus, quid gaudia vertat,
Quid lacrymas cieat, quidque intima viscera tangat.
BALCCIVS, heu satis ac super est edoctus, ut olim
Vltima deflevit Natarum fata duarum,
5 Quas simul ac dederat, rapuit Manus illa POTENTIS.
Sed tamen hunc potuit tantum superar<e> dolorem,
Vnica dum vixit; lepidis pergrata puella
Moribus ac vultu: quae funera maesta Sororum
Ipsa etiam, o dolor, <inseqvitur, luctumque Parentum>
10 Aggravat. Ah durum fati genus! Impio cogat
Quid non pectora? Tu vero te collige, Amice;
Nam praemissa Tua est: non est amissa<; perennem>
Pro fragili vitam nacta est in sede beata.
Hanc ipsi quoniam non suspiramus, Amati
15 Quod praeiere,<minus> graviter tolerasse juvabit.
Condolens Amico scr.
sanus, Hist. et Polit. P. P.
5. Adr: Maria Balccia – Aut: Sigismundus Pamphilianus (cf. 1)UUB (def), [Tartu UB]
EPICEDIUM
Colloquium Funebre.
Haec paucula condolentiae ergo app.
Sigismundus Pamphilianus Lypnic-
cens. Moravus p. t. Praec. Aul.
6. Adr: Benedictus Amundi – Aut: Laurentius Ludenius (In /.../ obitum et abitum /.../ Benedicti Amundi, Wermelandia-Sveci, SS. Th. stud. qui 28. Maij anno 1643. Dorpati Livonorum /.../ denatus; cujusque exuviae 1. Junij tumulo ibidem; quod est in Templo Mariano, sunt concreditae; scriptum ab amicis et condolentibus. – Dorpati Livonorum, <1643>: J. Vogelius.) H, [Tartu UB]
EPICEDIUM
Per Anag.
BENEDICTUS INDUAM.
Immortale quod est INDUAM honore decus.
In summo Capiti CHRISTO conjungar Olympo;
Cum CHRISTO aeternae gaudia lucis agam.
Condol. app.
Laurentius Ludenius, Ph. et J.U.D.
ac Prof. P.
7. Adr: Benedictus Amundi – Aut: Petrus Caroli Undenius (cf. 6) H, [Tartu UB]
EPICEDIUM
Ut rosa purpurei decus exoptabile veris,
Pandit odoriferas Sole oriente comas,
Mox Phoebi radiis, Boreaeque exercita flabris,
Claudit odoriferas Sole cadente comas;
5 Sic homo vitales quam primum prodit in auras,
A tergo instantis Spicula mortis habet.
Soli homini vitam stabilem natura negavit,
Non aetas eadem, quae fuit ante, redit.
O felix vitae cursum qui rite peregit!
10 Salvus in aeternum, qui bene vixit, erit.
Dic mihi, num terris melior, vel in aethere sors sit,
Dic mihi, quae vitae nomine digna magis?
Hanc, tribuente Deo, BENEDICTUS nactus utramque:
Et fruitur coelo, et vivit in orbe simul.
15 Mens coelos ingressa, dato recreatur Olympo,
In nostro et mundo fama superstes ovat.
Ex affectu syncero in pie denatum paucula
haecce apposuit
W. Gothus.
8. Adr: Benedictus Amundi – Aut: Johannes Jonae Allengreen (cf. 7) H, [Tartu UB]
EPICEDIUM
O Mors terribilis! mors horrida! mors et amara!
Quae nunc incessit tanta libido tibi?
O mors dira nimis, quae te inclementia cepit,
Quod cupida rapias optima quaeque manu?
5 Hic mihi jam testis BENEDICTUS morte peremptus,
Longum qui morbum corpore passus erat.
Inde Pater, Mater, Fratres, pariterque Sorores,
Profundunt lacrymas more fluentis aquae.
10 Cum Christo in coelis Angelicoque choro.
Quod moesto animo apposuit
W.Gothus.
9. Adr: Benedictus Amundi – Aut: Jonas H. Bechaelius (cf. 6) H, [Tartu UB]
EPICEDIUM
Quanquam vita, Dei mortali in corpore donum est,
Nostraque divina membra foventur ope:
Oppressa est tamen haec ingenti mole malorum,
Debilis, et nunquam vita dolore caret.
5 Non hic certa quies, non gaudia vera parantur,
Gaudia coelesti sola relicta choro.
Felices igitur vere, vereque beati,
In Domino vitam qui posuere suam:
Vulneribusque tuis confisi, Christe Redemptor,
10 Expectant vitae gaudia magna novae.
Sic BENEDICTUS adest placida jam morte peremptus,
Gothica quem tellus deliciosa dedit.
Doctrinam cupidis Evangelij auribus hausit,
A summa veniens quam tulit arce Deus.
15 Ac postquam in terris vitae jam stamina rumpi
Agnovit, victus mortis agone gravi,
Commendans animam tibi, CHRISTE; exordia vitae
Hausit non dubia Speque fideque novae.
Mens igitur Patriae fruitur coelestis honore,
20 Hoc tantum tegitur corpus inane Solo.
Condolentiae ergo scripsit
10. Adr: Benedictus Amundi – Aut: Olaus Michaelis (cf. 6) H, [Tartu UB]
EPICEDIUM
Certe pertenui dependent omnia filo,
Et subito casu corruit omnis homo.
Nulli luctificae didicerunt parcere Parcae;
Subditus et Dominus sunt in agone pares.
5 Mortis ab Imperio non Simson fortis abivit,
Non sapiens Salomon, non Cyrus ille potens.
Non igitur mirum quod jam BENEDICTUS obivit,
Qui vixit nostri fama Sodalitij.
Vixit! Christo animam pulchro concredidit ore,
10 Quae nunc in coelis gaudia plena tenet.
Jam tamen efferimus, tumulo et concludimus ossa
Corporis extincti! mortua membra jacent.
Sic anni in mundo nostri pereuntque caduntque!
Vita hominum, luctus perpetuusque dolor.
Doloris contestandi causa app.
11. Adr: Benedictus Amundi – Aut: Petrus Magni Esping (cf. 6)H, [Tartu UB]
EPICEDIUM
O dolor! O lacrymae! Quam fata miserrima gentis
Humanae! quam nunc sors inimica fluit!
Ante diem Parcas BENEDICTI rumpere fila
Cernimus; unde jacet mortuus ante oculos!
5 Et licet ipse mala non conditione fruatur,
Quando tenet superi regna beata poli.
Nos tamen hinc tristes in fletum solvimur omnes,
Dum spes succubuit pulchra sodalitij.
Condolentiae causa apposuit
12. Adr: Benedictus Amundi – Aut: Jonas Johannis Scarensis (cf. 6) H, [Tartu UB]
EPICEDIUM
Vitae quod solvitur hujus,
Praeterquam pagina Sacra,
Sat et experientia monstrat:
5 Tener hic namque ubera sugens,
Patitur vim mortis acerbae;
Itidem ejus Spicula sentit.
Alius pereuntibus annis
10 Canus, sua lumina Claudit;
Dubiis sic passibus errat
Hominum illa volubilis aetas!
Ejusdem fulmine tactus
15 Vigili qui strenuitate
Versabat Pallados Artes.
Almae is Pietatis amator,
Et Gestans cor sine felle
Arvum mortale relinquens
20 Hanc vocem e pectore fudit.
Vale nunc o lubrica vita,
Valeant chari mei Amici;
Vocor hinc ad coelica regna
Ubi sum mansurus in aevum.
25 Nunc tu exuvias cape tellus,
Invisit Spiritus astra
Ubi summo Numine gaudet
Dum coelum sidera pascet.
Ultimi honoris ergo appendit
13. Adr: Benedictus Amundi – Aut: Tholetus Arvikander (cf. 6)H, [Tartu UB]
EPICEDIUM
Strenuus Aonidum cultor BENEDICTUS AMUNDI,
Aeger erat: lecto decubuitque diu.
Strenuus Aonidum cultor BENEDICTUS AMUNDI,
Aetate in viridi hinc languidus emoritur!
5 Eheu quam dura est subitae inclementia mortis!
Invasit nostros Pieridumque sinus!
Floruit, ut floret rosa vivida, Sympatriota;
Floruit ingenio, floruit arte sacra!
Floruit; ast moritur Pietatis et Artis Alumnus;
10 Spes patriae moritur, Pieridumque Chori.
Sic nulli parcit subitae inclementia mortis;
Quae rosa mane viret, vespere demoritur!
Spiritus ast postquam mortales exuit artus,
Collustrat visu gaudia summa poli.
15 Hinc o dilecti vos proximitate Propinqui,
Mittite moerorem, mittite lacrymulas.
Tempus erit, quando revocabit membra sepulchro
Christus, et ad coelos vivificata feret.
Haecce paucula in pie Defuncti, Conterranei et commen-
salis sui memoriam, moestissimo animo subnectebat
Tholetus Arvikander, Vermelandus.
14. Adr: Benedictus Amundi – Aut: Laurentius Erici Emzlius (cf. 6) H, [Tartu UB]
EPICEDIUM
Triste, liquet, sydus quartas peragrasse Calendas
Junii[1]; quodque piis triste superstitibus!
Namque aurae eripitur, studiis qui vixit honeste,
Manes atque citos sustinet ille suos.
5 Aspice! Sed morbi longis cruciatibus ustus
Solvitur; atque ipsi redditur alma quies.
En! Pius in svavem concludit lumina somnum:
Laetaque jam coeli tecta beata subit.
Amoris et honoris ergo apposuit
W. Goth.
15. Adr: Benedictus Amundi – Aut: Andreas Helgonis (cf. 6) H, [Tartu UB]
EPICEDIUM
Funeris incerta est nobis mortalibus hora;
Mortis nil telo certius esse ferunt.
Musarum vigil, o noster BENEDICTUS, alumnus,
Hoc attestatur dum modo succubuit!
5 O quam jam tristis mors nobis illa futura,
Quae tamen ipsa tibi mors preciosa manet!
Namque tibi splendor requiesque est reddita grata;
Pro lachrymis retines gaudia vera Poli.
Amoris et honoris ergo fudit
16. Adr: Benedictus Amundi – Aut: Laurentius Laurentij Kilander (cf. 6)
H, [Tartu UB]
EPICEDIUM
Eheu quam subito nos haec mundana fatigant!
Omnia quam vani gaudia vana soli!
Carnis iere viam Patres turbante senecta;
Soepe tulit Juvenes mors inopina Viros.
5 Exemplum nostro BENEDICTUS ponitur aevo,
Musas qui coluit sedulitate pias:
Jam iacet exanimis telis confossus acuti
Morbi! mens alto gaudet inesse Polo:
Siste igitur Lachrymas, o tu charissima Mater;
10 Nam rapit heu cunctos mortis avara manus!
Moesto calamo apposuit
Laurentius Laurentij Kilander,
W. Gothus.
17. Adr: Benedictus Amundi – Aut: Andreas Andreae Tremulander (cf. 6)
H, [Tartu UB]
EPICEDIUM
Lurida quid rapido praestet mors, cernite, dente;
Infert Divitibus, Pauperibusque necem,
Quaeso, mala aspicite haec venerunt unde parata?
Morsu ah pestifero protulit Eva suo!
Vulnere lethifero corripit, atque premit!
Quod moesto animo appos.
18. Adr: Benedictus Amundi – Aut: Ericus Laurentij Kollingius (cf. 6) H, [Tartu UB]
EPICEDIUM
Nil prodest homini multos numerare per aevum
Annos, quando quies non datur ulla Piis.
Exemplum dat defunctus BENEDICTUS AMUNDI,
Quem morbus pressit; longior, eripuit.
5 Ast jam laetatur, morbi vicitque labores,
Cum Christo in coelis gaudia summa tenet.
Vltimi honoris ergo app.
19. Adr: Christina – Aut: Laurentius Ludenius (Immortalitas toga et sago illustrissimi, /.../ Gustavi Adolphi, Svecorum, Gothorum, Vandalorumque regis; /.../ parentatione anniversaria, in Regia Academia Gustaviana, quae Dorpati /.../ est /.../ die 6. Novembris anno 1642. /.../ aeternitati consecrata a Laurentio Ludenio, /.../ - Dorpati Livonorum, 1643: Typ. acad.)[2] SKB, UUB, LAB, [Tartu UB]
DEDICATIO
REGINA
Per Anagramma:
CHARIS
IN REGNA IT
SVECIAE.
Est Dea dicta CHARIS, Natura mitis et annis,
Officiosa Pijs, Deliciosa Probis.
Sancta CHARIS, CHRISTINA-CHARIS; Regina Serena
IN REGNA IT SVEONUM deveneranda CHARIS.
5 SALVE, Sancta CHARIS; SALVE, Regina; Jehova
Auspice, sis REGNis Mater-Honora-CHARIS.
20. Adr: Christina – Aut: Laurentius Ludenius (cf. 19)SKB, UUB, LAB, [Tartu UB]
DEDICATIO
S. Reg. Mai. tis
Symbolum.
CHRISTUS REFUGIVM SUORVM.
CHRISTus, virgINei Proles pulcerrima pArtus.
Progenies aequaeva Deo; Mortalibus agris
Antiquam Generis labem peccataque culpae
Tollens, obstructi et reserans claustra ardua coeli:
5 Est Re confugium REGINAE, est ortus ab alto
Irradians Vigor, Omnipotens Vigor omnia replens:
Optatum SVEonum CalIdAE per secula Lucis.
Munus, Numen, Honos, sperataque Vita Suorum.
Salve, aevi, Regina, CHARIS! Pietate vocante,
10 Erecto coelum vultu petat Enthea Virtus!
21. Adr: Christina – Aut: Laurentius Ludenius (Immortalitas D. liberatoris Livoniae, /.../ Gustavi Adolphi /.../ Svecorum, Gothorum, Vandalorumque regis; /.../ parentatione anniversaria, in Regia Academia Gustaviana Adolphina, quae Dorpati /.../ est die 6. Novembris anno 1643. /.../ aeternitati consecrata a Laurentio Ludenio, /.../ - Dorpati, 1643: Adad. typ.) [3] SKB, UUB, [Tartu UB]
DEDICATIO
ac Dominae,
Dei Gratia, Svecorum, Gothorum, Vandalo-
rumque Reginae, ac Principi Haereditariae; Magnae Principi
Finlandiae; Duci Esthoniae et Careliae; Dominae Ingriae, etc.
Victrici, Piae, Felici, Augustae, etc.
Vitam, Incolumitatem et Felicitatem p.p.
PATRIS, et aequaevae SOBOLIS, FLATUSque SACRATI
Annuat aeterna PACE perennis AMOR!
Est DEA dicta CHARIS, Natura mitis et Annis,
PACIS amans, Orbis deliciosa CHARIS.
Per Anagram.
CHARIS
IN REGNA IT SVECIAE.
5 Sancta CHARIS, CHRISTINA CHARIS; Regina Serena
IN REGNA IT SVEONUM deveneranda CHARIS.
Est Pater Illustris Phoenix in Prole renatus:
AdVeniat, Videat, Vincat amica CHARIS!
SS. Reg. Maj. Symbolum:
CHRISTUS REFUGIUM SUORUM.
Nam RE conFUGIUM REGINAE CHRISTUS; ab alto
10 Irradians, complens Regia Corda, VIGOR.
CHRISTUS, Numen, Honos, nitidissima Vita SUORUM:
Arctoi Regni Lux, Sator, alma Salus!
Salve, Sancta CHARIS! Salve, REGINA! IEHOVA
Auspice, sis Regni deliciosa CHARIS.
22. Adr: Petrus Magni Espingh – Aut: Ingemarus Petri Smetander (Oratio de vera Dei ecclesia: quam, /.../ in Regia Academia Gustaviana, quae Dorpati /.../ est /.../ die 17. Julij, anno 1643. publice /.../ enarrabat Petrus Magni Espingh, /.../ - Dorpati Livonorum, 1643: Lit. acad.) SKB, UUB, [Tartu UB]
GRATULATIO
Doctiss. et Ornatiss. Dn. Peroranti.
PETRE, subis montem Divum! bene sacra recludis,
Atque Ecclesiolae fata vicesque refers
Conatum egregium, conatum laudibus amplum,
Et celebrem studijs, non sine flore refers.
5 Egregios ausus laudo, his insistere perge;
Perge ita, doctus eris; Perge ita, major eris.
Deproperatum
ab
tandro Phil Cand.
23. Adr: Johannes Georgii Gezelius et Gertrud Guthemia – Aut: Laurentius Ludenius (Sacris nuptiarum honoribus /.../ Johannis Georgii Gezelii, in Regia Academia Gustaviana quae Dorpati /.../ est /.../ lingvarum Orientalium et Graecae, professoris ordinarii, sponsi; /.../ die 26. Junij anno 1643. Rigae conjugium contrahentis cum /.../ Gertrude, /.../ Petri Arvidi Guthemii, ecclesiae Svec. quae Rigae ad D. Jacobi colligitur pastoris, districtus Rigensis praepositii, nec non proto-synedrij Dorpatensis adsessoris /.../ filia, sponsa; quaevis fausta precantur Musae Embecciades. – Dorpati Livonorum, 1643: Typ. acad.) UUB, LAB, [H], [Tartu UB]
EPITHALAMIUM
Per Anagr.
GEZELI, EGREGIUS HONOS ANIMI.
Per Anagr.
VRGE: MITIS TRAHIT! PERGE DIU.
Clare Vir, et nostri decus immortale Lycei,
GEZELI; EGREGIUS sancta fulgentis in Arte
Floret HONOS ANIMI, et Veneris splendore coruscat.
Afflatus sanctae Eusebiae Divinitus aura
5 Tollis humo dociles ipsum super aethera mentes.
Est tua Socratico felix Sapientia sensu,
Et culto condit se pectore longa vetustas.
Alta Palaestina, et Latium, et Germania, et illa
Docta SveoGothico tibi Graecia profluit ore.
10 Eloquio resonante tuo, Veterisque Novique
O Testamenti veneranda Oracula, sancto
Pulcra lepore creant Studiosae corda Juventae,
Crescentique sacras jungunt cum pectore dotes.
Et jam, quod faustum ac felix velit esse Jehova;
15 Illa verecundis GERTRUDIS moribus aucta,
Archisacerdotis pulcherrima Filia PETRI
ARVIDI, Virgo natura MITIS et annis
Te TRAHIT, et sociae vocat ad nova gaudia vitae.
VRGE in amore pares ANIMOS: TRAHIT ardua Virtus,
20 MITIS amore Venus, felix constantia mentis.
PERGE DIU: et longo laetentur ut omnia seclo,[4]
GEZELI; EGREGIUS sancta florentis in Arte
Vivat HONOS ANIMI, et Veneris pietate triumphet.
Quod in felix auspicium
app.
PH. et J.V.D. Poët. C. Profess.
et pro t. R. M.
24. Adr: Johannes Georgii Gezelius et Gertrud Guthemia – Aut: Andreas Virginius (cf. 23) UUB, LAB, [H], [Tartu UB]
EPITHALAMIUM
GEZELI, Svada Hebraeae Grajaeque loquelae,
Eusebiae et Sophiae gloria laeta Deae.
Ergo verecundo GERTRVDIS amabilis ore
Virgo, venit thalamo Sponsa futura tuo.
5 Illa Sacerdotis Soboles nitidissima PETRI
ARVIDI, Generis deliciosus honos.
Ingenium Charites, veneranda Modestia vultum
Finxit, et insignis pectora casta Fides.
Qualis gemma micat, fulvum quae dividit aurum,
10 Talis in egregio conspicienda toro.
Sis felix sospesque diu: GERTRVDIS amata
Sit comes hinc vitae deliciumque tuae.
Plena venustatis sint omnia, plena bonorum;
Et videas grata Prole virere domum.
Quod animitus vovebat
Pom. SS. TH. D. et Prof. pri-
marius, ac Protosynedrij
Adsessor.
25. Adr: Johannes Georgii Gezelius et Gertrud Guthemia – Aut: Johannes Erici Stregnensis (cf. 23) UUB, LAB, [H], [Tartu UB]
EPITHALAMIUM
Cur non fortunae mihi Proles esse puteris,
Clare Vir ingenio, Clare Sodalitio?
Ecce tibi triplices, Christo Auspice, donat honores:
Sertaque promeritis fert triplicata comis.
5 Te Sophia edocuit, quo coeli machina motu
Currat, et amplexu sidera cuncta ferat.
Te Sophia edocuit, totum quo fine beatum
Dirigitur; quae sit norma verenda boni.
Hinc Sophia ornavit merita tua tempora fronde;
10 Imposuit capiti serta Magisterij.
Ingenij vires mirata est ardua Pallas
Et dixit; Felix ille Professor erit.
Ascendat cathedram Hebraeae Grajaeque loquelae,
Mercurij Sobolem svaviter erudiat.
15 Cecropiae inde sonat feliciter aemulus urbi,
Hebraeique oris gratia multa fluit.
Vidit, et ut vidit Venus; admirata; loquuta est,
An non imponam myrtea serta Viro?
Dixit; et ad clarae duxit pomoeria Rigae,
20 Floret ubi coetus gloria Virginei.
Candida GERTRUDIS floret GUTHEMIA Virgo,
FIDA futura domo, candida fama toro.
Vidit; et igniculos mansuri immisit amoris,
Alter et alterius gaudet amore frui.
25 Quid non Fortunae te prolem dixerit? una
Nocte; Magistra, tua est Sponsa; Marita tua est.
Annuat Omnipotens: finitis mensibus, aequo
Vox Patris, Matris, Prolis et ore fluat.
Multa efflorescat gratarum copia rerum,
30 Mutua speratae gaudia pacis eant.
Ita p.
GNENSIS, Physices et Ast. P.O.
26. Adr: Johannes Georgii Gezelius et Gertrud Guthemia – Aut: Andreas Sandhagen (cf. 23) UUB, LAB, [H], [Tartu UB]
EPITHALAMIUM
Salve laeta dies, Sponsis quae sidere fausto
Affulges, stabilique Sacros conjungis amores
Foedere; tuque pijs votis Sponsi et Neonymphae
Nox optata, novi thalami spes maxima, salve!
5 Cognitione valens Sanctae GEZELIVS artis
Lingvarum, nostri pars haud postrema Lycei,
Insignis pietate Viri dum visitat aedes
GVTHEIMI, egregia captus virtute puellae
GERTRVDIS, castos formae praestantis amores
10 Concipit, occultoque simul mox carpitur igni.
Non potis extingvi hic, Derptae seu nota vicissim
Tecta subire paret, seu praemeditata per artem
Tradere publicitus cupiat, GVTHEIMIA Virgo
Mox retrahit, Rigam vocat ad socialia lecti
15 Foedera, Numinis auspicio jungenda supremi.
Felix par: Socero hoc felix Gener; atque vicissim
Felix hoc Genero Socer; ac dignata Mariti
Talis conjugio felix ante omnia Sponsa!
Sit, rogo, foecundus vester torus, atque quietus:
20 Intemerata fides, pax, et concordia firmo
Stent pede: Quodque annis adimet rugosa senectus,
Id juvenescenti totum, precor, addat amori!
Quod animitus voveo
North. Hist. et Po<li>t. P.P.
27. Adr: Johannes Georgii Gezelius et Gertrud Guthemia – Aut: Joachimus Schelenius (cf. 23) UUB, LAB, [H], [Tartu UB]
EPITHALAMIUM
Munus Arithmetici Sponsus subijsse videtur,
Nam quatuor species callet et arte tenet.
Multiplicat, numerat, restantia subtrahit, addit,
Ast non gaudet mens addita dividier.
5 Aetatem numerans, inquit, jam vivo tot annos,
Absque ferace tamen conjuge sumo dies.
Principium numeri est Unum, non dividit unum,
Insuper et species multiplicare nequit.
Ergo carpit iter Rigam velociter, addit
10 Electam Sociam cum pietate sibi.
Virginitatis ei cinglum[5] mox subtrahit, atque
Conatur speciem multiplicare suam.
Tu Deus his adsis curans ne dividat ambos
Mors praecox; longos da sed utrique dies.
Amicitiae ergo approperabat
Math. inf. P.P.
28. Adr: Johannes Georgii Gezelius et Gertrud Guthemia – Aut: Michael Bostadius (cf. 23) UUB, LAB, [H], [Tartu UB]
EPITHALAMIUM
Candida Divino fiunt connubia nutu,
Dum Pater omnipotens, rerum cui summa potestas,
Casta Salutifero succendit pectora Amore,
Connectitque pias sociali stamine mentes,
5 Vt sint inter sese, auresque manusque pedesque.
Clare vir, et Clarij pulcherrima fama Lycei
GEZELI, decus Haebraeae Grajaeque loquelae;
Ecce tuum in thalamum castissima Virgo locatur,
Moribus insignis, natura mitis et annis,
10 Clari GVTHEMII pulcerrima Gnata Parentis,
Nomine GERTRVDIS; bene fida; columna Penatum;
Optata capias ingentia gaudia mente,
Mutua constanti dulcedine commoda crescant,
Et mansura pijs, veniant incendia flammis.
15 Sitis faecundi, foecundi sitis in Annos:
Et pia progenies felici crescat honore
Palmitis instar hebens, totam mensamque coronans.
Sic precor et voveo; nostris, Deus, annue votis.
Fausti ominis E. scrib.
29. Adr: Johannes Georgii Gezelius et Gertrud Guthemia – Aut: Adrianus Verginius (cf. 23) UUB, LAB, [H], [Tartu UB]
EPITHALAMIUM
Incomitatus iter formosus carpit Apollo
Visurus Venerem, dulcis quae mater amoris.
Vectus equi dorso nunc huc, nunc devius illuc
Errabat. Mens hinc curarum fluctuat undis.
5 Forsan in occursum Corydon properabat; Apollo
Talia voce refert; quo tendis amice Viator,
Dic, via quae pulchram Veneris me ducat ad arcem?
Tu quis? respondet Corydon: mox insit Apollo;
Clarus Apollo vocor, non est me doctior alter,
10 Immortale meum volitat super aethera nomen;
Eloquar ut brevibus; sum qualibet arte Magister.
Subridens Corydon, tune inquit gnarus es omnis
Artis, et a trito declinans tramite nescis
Mater amoris ubi sua dulcia tecta locarit?
15 Haec via quem lateat? docuit Natura Magistra.
Ad te sermonem, Clarissime, dirigo, Sponse;
Ingressurus iter, non somniculosus aberra
Tramite, nam Corydon errantem risui habebit.
20 Serva consilium quod praestat amicus amico,
Hinc iter ut coeptum Supremus prosperet opto.
In honorem Clarissimi Dn. Sponsi, Amico
sui certissimi ita ludere voluit
ADRIANUS VERGINIUS, Julino Pomeranus,
Eccles. Nügg. prope Urbem Dorpatum Pastor, et
Facultatis Theol. Adjunctus.
30. Adr: Johannes Georgii Gezelius et Gertrud Guthemia – Aut: Olaus Georgii Salenius (cf. 23) UUB, LAB, [H], [Tartu UB]
EPITHALAMIUM
Qva nunc laetitia Sponsus cum conjuge casta,
Quo laeto plausu gestiat ille, vide.
Candida GEZELIO juxta assidet ore rubente,
Eloquitur placido verba directa sono.
5 Alter in alterius consvescit abire lacertos,
Alter et alterius gestit amore pio.
O quam dulcis amor, simili qui pectora nodo
Bina arctat, morem dexteritate fovet!
Felix qui potuit socium cognoscere talem,
10 Auxilio similem mente animoque parem!
Vt vigeat flagrans syncero in pectore flamma
Ad pia propensum vota vocabo Deum.
Pulchra prole Domum vestram repleatis, ametis
Mutuo amore; bonum det Deus omne, precor!
Jocus Esthonicus.[6]
Net kahsiket kick ohtwat sind/
Wotta Morsia/ mene tanzi/
Ninck hoya sa ohma kanzi:
Sina Raudkesi mööka kahn/
20 Saisa vllihaste sähl mann/
Wie Peigk ninck morsia senge/
Lasze neidt vtzinde mengi:
Jumal andko neile onne/
Sedde mina neile günne.
Gratulabundus scribebat
Wesmannia Svecus Past. Rigensis.
31. Adr: Johannes Georgii Gezelius et Gertrud Guthemia – Aut: Ingemarus Petri Smetander (cf. 23) UUB, LAB, [H], [Tartu UB]
EPITHALAMIUM
Nubila cum Coeli cessarent, atque niteret
Aether, corripio viam,
Deside nec passu pergo, quo in valle reducta
Sensus exhilarem meos.
5 Sed dum mirabar, gemmantes jammodo flores,
Vento concidere arduo:
En Rosa sangvineo cadit aucta colore: recumbit
Narcissus; violae cadunt.
Paeoniam video Regalem, Hyacinthum, Amaranthum
10 Emarcescere maxime.
Haec ego cum fessus vigili sub mente foverem
Mox somno placido fruor.
Obtulit in somnis se Diva potens mihi Cypri:
Splendent sardonychis comae.
15 Talibus aggreditur me dictis: Mitte tenellas
Mirati violas meas,
Volve animo flores, quod flatus non Nabathaeus
Unquam sternere sit potens:
Virtutis tantum semper possessio constans,
20 Constans ejus et est decus:
Floribus his tinctus nobis est gratus Amicus,
Qui mentis violas fovet;
Scilicet egregij GEZELI fama virescit.
Ut longo vireat die,
25 Dante Deo, Virgo GERTRVDIS jungitur ipsi
Conjux florida, candida.
Somnus abit subito: quo commoda mille precarer;
Sic facta voveo prece:
Spiritus o Domini jungendos dirigat, aptis
30 Et Vinclis animos liget;
Accipiant faciles successus tempore longo;
Et non sit sterilis torus.
In felix ausp. ap.
tander, W-Gothus, Ph. Cand.
32. Adr: Johannes Georgii Gezelius et Gertrud Guthemia – Aut: Andreas Matthiae <Torpensis> (cf. 23) UUB, LAB, [H], [Tartu UB]
EPITHALAMIUM
Festa dies haec est merito tibi, Clare Magister,
Qua celebras thalami gaudia vera tui.
Gratulor inde tibi Sponsam quod moribus aptam
Nactus, quae requies grata futura tibi:
5 Hac cum permultos vivas feliciter annos
In pietate, bona pace, fideque tori.
Faxit Jova, piae maneant vos praemia vitae,
Atque Deus thalamum divite prole beet.
Honoris et debitae observantiae
ergo apposuit
33. Adr: Johannes Georgii Gezelius et Gertrud Guthemia – Aut: Laurentius Mormannus (cf. 23) UUB, LAB, [H], [Tartu UB]
EPITHALAMIUM
Nvminis auspicio sociati foedera lecti
Qui pangunt, sumunt gaudia vera tori:
Prosperitas rerum fundumque domumque beabit,
Vsque domi requies, usque quiesque foris.
5 Jungeris Veneri sociali foedere GERTRVD
JANE, fide pollet deliciosa Venus.
Purpureis socios animis appone lacertos,
Blandisonis dictis oscula junge genis.
Aeternus vobis Christus benedicat: Amori
10 Prospera multa ferat, gaudia vera ferat.
Felix sit vester Corbis, sint relliquiaeque.
Sit Chorus hinc faustus, sitque in honore torus.
34. Adr: Johannes Georgii Gezelius et Gertrud Guthemia – Aut: Petrus Caroli Undenius (cf. 23) UUB, LAB, [H], [Tartu UB]
EPITHALAMIUM
Foeminei felix, GERTRVDIS, gloria sexus;
Quod felix faustumque velit Deus esse Jehova;
En tibi GEZELIUS, Decus immortale Lycei,
Gloria Musarum, vinclo propiore ligatur.
5 Hic tibi sit socius curae, sociusque laboris,
Dissidij fugitans, requies, pax optima rerum.
Hic tibi floriduli thalami sit portus amoenus.
Florida nascantur genialis pignora lecti;
Sic laeti sine fine dies, sine lite triumphi
10 Exsurgent, et erunt optatae secula vitae.
Debiti honoris causa adjecit
W-Gothus, S.S. Th. Stud.
35. Adr: Johannes Georgii Gezelius et Gertrud Guthemia – Aut: Sigismundus Panphiliani (cf. 23) UUB, LAB, [H], [Tartu UB]
EPITHALAMIUM
Sponsi Sermocinatio.
GERTRVD, quae vitijs talibus omnibus
En Gentilibus o caret;
Hac abluta Sacro Sangvine, libera est;
5 Hoc vitam precio Poli
Mercata est, et opem praetulit optimam;
Hoc salvante, simul Stygis
Aeternis caret et supplicijs, docent:
Hanc Nuptam propere novam
10 Donec fata sinent, pectore diligam
Ex toto. Eja igitur bene
Miscentur Cyathis pocula commodis,
Convivae ut celeres bibant;
Centenos Cyathos offerat hospiti
15 Hospes: Nunc pariter licet
Perpulchras manibus tangere mollibus
Nymphas cumque Sororibus.
Nunc saltare juvat; cur Berecynthiae
Cessant flamina tibiae?
20 Cur pendet tacita fistula cum lyra
Parcentes ego dexteras
Odi: tange lyras: audiat optimus
Saltantes Veneres pias:
Me castus Veneris torret amor meae.
T»j fil…ajergo properabat
Lypniensis Moravus
36. Adr: Johannes Georgii Gezelius et Gertrud Guthemia – Aut: Nicolaus Psilander (cf. 23) UUB, LAB, [H], [Tartu UB]
EPITHALAMIUM
Qvid facis Embeccae gratissima Najadum venustas?
Vesanus ignis pectus unice urit?
Sic ipsi voluere Dij: Sic nostra fata pulcrae
Sinu puellae leniter feruntur;
5 Hactenus ut solis, GEZELI, rite Cynthiae horas
Musis dedisti, tutus ambulasti.
Esse tibi ulterius tuto haud licet: Est puellularum
Festiva credas turba saepe fallax.
Si Superi vellent, nec possent subvenire: Et ipse
10 Feretrius cum defuit suo igni.
Tactus erat primo Germanae (tunc tenellae) amore,
Coepit Monetam non sororem habere.
Viderat hoc quondam Grandaevus Falciger Parens: Sed
Amore crimen casto erat tegendum
15 Soepius et Cybele conspexerat optime oscula ambum,
Quae castitatis signa computarat.
Juppiter interea suspiria duxerat frequenter,
Et corda blandi traxerant furores.
Quaque suos gressus Juno tulit, Anxurus tulitque,
20 Assedit, arcte et junxit usque corpus.
Oscula disposuit: Sed quid post illa sustineret
Vix ipse novit: Morbum amare coepit.
Nec mora, jam macies priscum hauserat artuum vigorem;
Hinc dat querelam Matri, et haec Marito,
25 Lumina mox Chiron movit, placide atque opem medelam
Manus salubres contulit senectae.
Audijt hoc latitans sinuosa in valle tum Prometheus,
Nondum Typhonis Filiae rapina.
Vtque fuit primum noxae illi consulens subortae,
30 Risit, remittens Matris ad suae aras.
Templa adijt Themidos, cespes fuit isque stramine auctus
Casae ad fores mox fulmen ille figit.
Haec Superis responsa dedit, non saxa Delphica ulli
Comansve Laurus cognita orbi adusque.
35 Reddita vox luco, audierant quam Najades sub antris.
Celare vultus hinc Deae trementes.
Hoc Iuno, quod poscis, habet tibi quas petisque sortes:
Sinu feruntur fata sub Sororis
Caeco aenigmate perculsus stetit Anxurus timensque
40 Simplex erat, tum nescius futuri.
Rursus in amplexum Germanae fertur, albicantes
Vt ante jungit molliter genellas.
Quoque nihil desit velamina sternier per herbas
Iubet, reponit sindonemque Iuno:
45 Conjuncti hinc pariter recubabant arboris sub umbra.
Ambo soporem ceperant eundem.
Sic ipsi voluere Dij: sic nostra fata pulcrae
Sinu puellae leniter feruntur.
Hac volo narrata: At tu Excellens Sponse, Juppiter sis,
50 GERTRVDA Juno, Fatum habens beatum
Dos est: IVgaLIs CastItas,
PIetas, LeporqVe: CharItas,
SpeCIe VenVstas, et pVDor:
HanC Conferet tIbI, aVgVror.[7]
55 Conjunx erit domi tuae,
Ceu vitis uvis obsita:
Mensam secus nati tui,
Dulces Olivae ramuli.
Producet avum largius
60 Deus benignitatibus:
Cernas nepotes ut tuos,
Datos fovere parvulos!
Quod devote precatur
landia Svecus.
37. Adr: Johannes Georgii Gezelius et Gertrud Guthemia – Aut: Petrus Trottonius (cf. 23) UUB, LAB, [H], [Tartu UB]
EPITHALAMIUM
Omnipotens rerum Dominus, qui cuncta creavit,
Quique sua patria pro bonitate regit;
Legitima instituit nos pangere foedera lecti,
Quo vagus absit amor, castus et adsit amor.
5 Quae Deus instituit, bene servas, Clare Magister,
Sponsam quaerendo ti probitate parem.
Grator; utrique precor Deus ut bona coepta secundet:
Felix vita fluat, sit sine lite thorus!
Florescat thalamus, crescat bona copia rerum!
10 Vestrum nec solvat mors nisi lenta thorum!
ANNO
IVngItVr, EVsebIae proLes pVLCrae GeretrVDae,
GeZeLIVs; tIbI Da pLaCeant ConnVbIa, ChrIste![8]
Ita Neonymph<is> gratulari voluit
38. Adr: Johannes Georgii Gezelius et Gertrud Guthemia – Aut: Haquinus Platinus (cf.23) UUB, LAB, [H], [Tartu UB]
EPITHALAMIUM
Hostia mactetur Matronae grata; cupitat
GEZELI dum ulnas casta Virago petit.
Excerpatur Fel quodcunque et corpus acerbi
Traxerit; Huc prunas Cypris amica tulit.
Votum.
5 NUMFI'E kaˆ NU'MFH, ˜picirhsin telšseien
U'metšrhn QEO'S E'urumedwn, Ón ˜gë litanšuw,
O“fra tÚchte g£mon toioÚ tîj ïde sinape‹n,
E'n t' ¢utù mak£ron makrÕn te bion biotšuein.
“Wste B…oio ¢n»kontej toÚtou di¦ pantšj
10 KlhronÒmoi b…ou ¡i d…ou kat¦˜lpida ˜‹nai.
Koit£nou ™ir»nh, ¼ p£nta nÒon, sof…hn te
Nik´, frouršitë fršnaj ¨metšraj, krad…aj te,
’Ifi ¦pwsamšnh kak¦ tant' ™n Cristî I'hsoà,
ú™ij ¢iînaj g' ªinoj, kaˆ dÒxa, kleoj te.
Debita observantiae ergo app.
39. Adr: Johannes Georgii Gezelius et Gertrud Guthemia – Aut: Andreas Bergh (cf. 23) UUB, LAB, [H], [Tartu UB]
EPITHALAMIUM
MAGISTER IOHANNES GEORGII GEZELIVS,
HEBRAEAE AC GRAECAE LINGVAE PROFESSOR
DORPATENSIS PVBLICVS: SPONSVS.
Per Anagr.
AH SVRGE; I HVC SPONSA GERTRVD EGREGIA
GAZA LECTI: SIS BONA SORS, BONA VIS, SPES,
MEL, NON FEL: O PIE IESV, PRAEI AC REGE.
Sermocinatio Sponsi.
Omnipotens Princeps, casti fundator amoris,
Quique homines Socio jungis amore tori:
Mordaces hominum curas et taedia vitae
Nosti, dum solus non bene vivit Homo.
5 Nam thalami consorte carens, male vivit in orbe,
Et vix ille hominis nomine dignus erit.
Ducit; curarum dulce levamen abest.
Plena labore dies, versant suspiria lectum,
10 Quando aerumnarum dulce levamen abest.
Et licet exuperet fulvo Croesumque Midamque
Auro; et fac teneat jugera mille soli:
Res tamen angusta est, angusti et cultor agelli,
Hoc si curarum dulce levamen abest.
15 Nonne igitur quaeram socium mihi rite fidelem?
Quae mihi curarum dulce levamen erit?
Quaeram: tu sociam vitae da; Christe, fidelem,
Quae mihi curarum dulce levamen erit.
AH SVRGE O SPONSA EGREGIA, HVC I GAZA cupita
20 GERTRVD tu lecti dulce levamen eris.
SIS BONA SPES, BONA SORS, VIS, MEL, NON FEL; mea SPONSA
Sic mihi curarum dulce levamen eris.
O PIE IESV I PRAE, casti fundator amoris,
Ac placido nutu tu REGE cuncta tuo,
Per anag.
ID GRATVM, SPONSE, VRGET.[10]
Sponsae Respons.
25 Quod pia fata volunt, VRGET Divina voluntas,
Gezeli, ID GRATVM, SPONSE, decusque meum.
Clarus quod genitor genitrix fidissimaque VRGET,
Gezeli, ID GRATVM SPONSE Decusque meum.
VRGET quod syncerus amor, castissimus ardor,
30 Gezeli, ID GRATVM SPONSE decusque meum.
Quodque tori sociam nunc me cupis, ID mihi GRATVM;
Castaque sub tacito gaudia corde gero.
En tua ero GERTRVD re florescente secunda,
Sortis et angustae tempore fida Comes:
35 Sum tua, sisque meus, constanter amabo Maritum
Dum potero lingvae plectra movere meae.
Votum.
Hincce favete animis, queis Christi nomen amori est,
Laetaque nunc Sponsis cuncta rogate pijs.
Svavia perplacidae consumant secula vitae,
40 Purus perpetuo foedere perstet amor.
Perstet amor foecundus amor, facundior herba, ut
Magna nepotum altos turba salutet avos.
Castos Angelicae cingant turmae usque Penates,
Hostis ne noceat tartara nigra colens.
45 Diffugiant curae; procul avertatur Erinnys,
Pace bona aeternum floreat ampla domus.
Musa sile. Neonymphe Vale, Vale Sponsa beate,
Candida sint semper foedera; Christe, fave.
Distichon Numerale.
GezeLIo InsIgnI se IVngIt bLanDVLa GertrVD
50 RIgae; hInCCe o CastVs PVLLVLet, oro, torVs.[11]
Honoris et deb. gratitud. ergo Sympatriotae
et Promotori suo Magno, ita an<imit>us
40. Adr: Johannes Georgii Gezelius et Gertrud Guthemia – Aut: Andreas Folchovius (cf. 23) UUB, LAB, [H], [Tartu UB]
EPITHALAMIUM
Insignem facie, Censu et Virtute puellam
Largiri poterat Svecica terra tibi.
Sed Venus inde vocans ad amoenae moenia Rigae;
Hic tibi, ait, dudum est certa parata Venus.
5 Hic te pulcra manet GERTRUDIS origine virgo,
Mille petita procis, mille negata procis.
Nec mora; certa fides Veneris promissa secuta est:
Jam subit amplexus casta Virago tuos.
Haud temere obveniunt Connubia grata: Maritam
10 Unicuique suam donat habere Deus.
Donat foecundam fortunatamque Maritam:
GEZELIana Venus, sit speciosa Venus!
Andreas Folchovius, Nericiensis.
41. Adr: Johannes Georgii Gezelius et Gertrud Guthemia – Aut: Johannes Allengreen (cf. 23) UUB, LAB, [H], [Tartu UB]
EPITHALAMIUM
Exoptata dies oritur, praeclare Magister,
Qua datur in thalamum casta Virago tuum.
Hanc tibi cum primis devoto gratulor ore
Sponsam: atque ambobus candida fata precor.
5 Vivite concordes, felicem vivite vitam:
Unus amor vobis adsit et una fides.
Johannes Allengreen / W-Gothus.
42. Adr: Johannes Georgii Gezelius et Gertrud Guthemia – Aut: Henricus Hierzelius (cf. 23) UUB, LAB, [H], [Tartu UB]
EPITHALAMIUM
Conatur studio; hac nescius arte capi:
Ast captus, caveae secernens rite recessus
Nae repetit frustra an detur abire foras:
5 Sic multi aspiciunt speciosa cacumina tecti,
Inficiens sub quo foetida crypta latet.
Sic numerosa virum et juvenum occoecata caterva,
Externa an specie decipitur Veneris?
Auguror, optatam te selegisse puellam,
10 GEZELI, felix gloria Thespiadum.
Non Sophiae proles, Circes modulamine tacta,
Nec cessit metuens Colchidos insidias.
Auguror, exoptata datur Lectissima Virgo,
Dum GERTRVDA venit blanda columna domus.
15 Auguror? Vxoris castos veneraris amores,
Dum crescit Pietas, cum pietate pudor.
Vivite Cumaeos annos: et taedia taedae
Evitate datae! Spondeo, sponda viret!
43. Adr: Johannes Georgii Gezelius et Gertrud Guthemia – Aut: Laurentius Lohm (cf. 23) UUB, LAB, [H], [Tartu UB]
EPITHALAMIUM
Numina quod Sponsam jungunt tibi Sponse pudicam,
Gaudeo: sit fulcrum nobile Conjugium.
Optimus et Sponsus tibi quod datur, optima Sponsa,
Gratulor: in terris vir bonus, alter olor.
5 JOVA Pius faxit, ne gaudia vestra vel unus
Per multas questus turbet Olympiadas,
Sed tumulo tandem placide coëatis in uno,
In thalamo postquam nulla querela fuit.
44. Adr: Johannes Georgii Gezelius et Gertrud Guthemia – Aut: Petrus Andreae Falck (cf. 23) UUB, LAB, [H], [Tartu UB]
EPITHALAMIUM
Attulit optatum tibi nunc, praeclare MAGISTER,
Tempus, amans Juno; pia quo tibi jungitur uxor
GERTRUDIS GUDHEIMS pulcris genitoribus orta,
Nympharum splendor, virtutibus aucta Virago,
5 Et laeto vernans jucundae flore juventae.
O igitur Patria et dulci Genitrice relicta
Semper in amplexu dilectae Conjugis haere!
Sint faciles in amore dies, et gaudia laeta,
Atque adnascantur felici sorte nepotes.
45. Adr: Johannes Georgii Gezelius et Gertrud Guthemia – Aut: Arnoldus Mahlstedt (cf. 23) UUB, LAB, [H], [Tartu UB]
EPITHALAMIUM
Phoebaea exoritur bene lux, praeclare Magister
GEZELI, conjux qua tibi pulcra datur.
Hanc ornat morum candor, mens dedita Christo,
Integritas, pietas, et probitatis honor.
5 Haec tibi felici confestim sorte dicatur,
Ut tecum socios vivat agatque dies.
Praesto sit Christus sociali foedere junctis,
Conjugiumque novum prosperitate beet.
46. Adr: Gustav Adolph – Aut: Laurentius Ludenius (Immortalitas toga et sago illustrissimi, /.../ Gustavi Adolphi, Svecorum, Gothorum, Vandalorumque regis; /.../ parentatione anniversaria, in Regia Academia Gustaviana, quae Dorpati /.../ est /.../ die 6. Novembris anno 1642. /.../ aeternitati consecrata a Laurentio Ludenio, /.../ - Dorpati Livonorum, 1643: Typ. acad.) [12] SKB, UUB, LAB, [Tartu UB]
DEDICATIO
REX
ADOLPHUS.
Per Anagramma;
REX
AUGUSTUS
HAS DVPLO.
S. Reg. Maj. tis
Symbolum:
CUM DEO ET VICTRICIBUS ARMIS.
Gratia, CHRISTE, tua est; Patriae Civemque Patremque
Quod gero, Res Sancti curo quod Imperij.
Gratia, CHRISTE, tua est; quod Res Victricibus Armis
HAS REX AUGUSTUS conduplicando DUPLO.
5 CHRISTO Dante, mea Phoenix in Prole renatus
VIVO: Deo Vivat Regia Progenies!
47. Adr: Gustav Adolph – Aut: Laurentius Ludenius (Immortalitas D. liberatoris Livoniae, /.../ Gustavi Adolphi, Svecorum, Gothorum, Vandalorumque regis; /.../ parentatione anniversaria, in Regia Academia Gustaviana, quae Dorpati /.../ est /.../ die 6. Novembris anno 1643. /.../ aeternitati consecrata a Laurentio Ludenio, /.../ - Dorpati Livonorum, 1643: Typ. acad.)[13] SKB, UUB, [Tartu UB]
DEDICATIO
REX
ADOLPHUS.
Per Anagramma;
REX
AUGUSTUS
HAS DVPLO.
S. Reg. Maj. tis
Symbolum:
CUM DEO ET VICTRICIBUS ARMIS.
Gratia, CHRISTE, tua est; Patriae Civemque Patremque
Quod gero, Res Sancti curo quod Imperij.
Gratia, CHRISTE, tua est; quod Res Victricibus Armis
HAS REX AUGUSTUS conduplicando DUPLO.
5 CHRISTO Dante, mea Phoenix in Prole renatus
VIVO: Deo Vivat Regia Progenies!
48. Adr: Martinus Henschelius et Elisabetha Hein – Aut: Laurentius Ludenius (Sacris nuptiarum honoribus /.../ Martini Henschelii, ecclesiae Christi, quae Revaliae ad D. Olai templum colligitur, in verbo ministri /.../ sponsi; /.../ die 2. Januarij anno 1643. conjugium contrahentis cum /.../ Elisabetha /.../ Henrici Heinii, J. U. D. eximij, ejusdemque in Regia Universitate Gustaviana, quae Dorpati /.../ est /.../ professoris /.../ et Supremi ibidem Judicij Regij adsessoris /.../ filia, sponsa; quaevis /.../ precantur Musae Embecciades. – Dorpati Livonorum, 1643: Typ. acad.)
Tallinn SA, [Tartu UB]
EPITHALAMIUM
|
Per Anag. HUMANIS CHRISTUS LENE! |
Per Anag. |
Musarum Decus, HENSCHELI; sic tempore eodem
Se tibi despondet cum Venere Eusebia!
Eusebia eloquio pandit mysteria; CHRISTUS
Casibus HUMANIS LENE Levamen adest.
5 Casta Venus sanctae gaudet se jungere Divae
Ut commune pio pectore portet onus.
Casta Venus miro lucet candoris honore,
Et Patris et Matris sangvine clara Venus.
Hoc vitae formaeque datum; Venus ipsa videnda
10 Sit specie eximia, et Moribus ingenua.
Qualis gemma micat, fulvum quae dividit aurum,
In socia talis sorte futura Venus.
Et vitae radix! et fulcrum totius aevi!
Omne laboris onus mutuus abdet Amor!
15 Sic HIS LENE animis! sic HIS data fata BEATA!
Et bene juncta Viro cum Venere Eusebia est.
Quod ipsum in felix omen ap.
J.V.D. Profess. et pro t. Vniv. R. Mag.
49. Adr: Martin Henschelius et Elisabetha Hein – Aut: Andreas Virginius (cf. 48)
Tallinn SA, [Tartu UB]
EPITHALAMIUM
Clare Novenarum cultor, MARTINE, Sororum,
Et desiderij pars animique mei.
Dante Deo, geminum tibi nos gratamur honorem,
Optamus coeptis prospera fata tuis:
5 Eloquio Dominum Christum quod detegis urbi,
Et spargis Verbi semina sacra Dei:
Illustrans monitis dociles sic erigis aures,
Ut verae accipiant Relligionis opes.
Inde, quod et faustum et felix velit esse Jehovah,
10 Nunc intrat thalamos virgo venusta tuos.
Moribus egregijs et Clara stirpe coruscans
Virgo datur votis ELISABETHA tuis.
Aspiret gemino fortuna secunda triumpho.
Pastor, vive choro; vive, Marite, toro.
Aliud.
15 En! capias Sponsam, ter felix Sponse, venustam,
Quae te flagranti coepit amore sui.
Tu blandimentis illi constanter adhaere,
Se captam suavi dicat amore tui.
Sic taedis vestris Dominus benedicet in altis,
20 Quaeque precor vobis, prospera cuncta dabit.
Sic gratulatus est Neo-
nymphi<s>
et Profess. P.
50. Adr: Martin Henschelius et Elisabetha Hein – Aut: Salomon Matthiae (cf. 48)
Tallinn SA, [Tartu UB]
EPITHALAMIUM
Vir Reverende, pio monstrarunt dogmate Musae,
Quae probet ingenij dona beata DEUS.
Hinc nunc Conjugium sociae est Academia vitae,
Qvod praesens aevi postulat usus, habet.
5 Rite doce populum, coeli novisse Potentem:
Disce domi curis invigilare pijs:
Sic te coelestis, sic cura domestica ditat:
Invenit et numeros vita beata suos.
deproperab.
S.S. Theol. P.P. et Pastor.
51. Adr: Martin Henschelius et Elisabetha Hein – Aut: Adrianus Verginius (cf. 48)
Tallinn SA, [Tartu UB]
EPITHALAMIUM
En Sponsas, pie Sponse, duas tibi provida copu-
lavit cura DEI: gratulor inde tibi.
Revaliae Christi quae sancta Ecclesia verbo
Colligitur, primam Sponsam ego dico tuam.
5 Altera Sponsa tua est pietate corusca puella,
Quam dat in amplexus lux hodierna tuos.
Exultans, Neonymphe, tuas, quas nactus es, orna
Sponsas, atque tui sis memor officij!
Exorna primam solando, monendo, docendo,
10 monstraturus ei quae sit ad astra via.
Gigne Ministerio Verbi ter mille fideles
CHRISTO filiolos filiolasque pias.
Dilige cordicitus Sponsam, vir docte, secundam,
quaque placere potes tu ratione place:
15 Instar et Isaaci cum illa ludendo jocare,
sic TIBI filiolos filiolasque dabit.
Tu DEus hasce duas qui junxti[14] foedere Sponso
Sponsas, sis praesto gratia utrique tua!
Da Sponso vires ut sedulus ornamento
20 esse queat Sponsis, hisce praeesse diu;
Dirige Sponsarum sancto quoque Numine mentes,
ut Sponsum exhilarent debito amore suum,
Et tandem fidus cum Sponsa Sponsus utraque
Coelestis Patriae gaudia possideat!
Id quod congaudent Sponsis, de
corde precatur
Pomeranus, Ecclesiae Nüggensis prope
52. Adr: Martin Henschelius et Elisabetha Hein – Aut: Sigismundus Panphiliani (cf. 48) Tallinn SA, [Tartu UB]
EPITHALAMIUM
Somnium Nuptiale.
Vix aderant nuper fugiente crepuscula Phoebo
Stratorum lecto cum mea membra darem.
Vix aderat somnus, lassos qui stringit ocellos
Attulerat mihi dum somnia mira sopor.
5 Heinschelij ante fores cito ceu vitis generosa
Succrevit vernans pulcra nitore, diu:
Fructibus eximiis decoravit limina tecti,
Ac habita tori commoda multa tulit.
Ominis ignarus tanti, sortisque futurae,
10 Mirabar trutinans quid data signa velint?
Ast miranti aderat Vates mox forte peritus,
Explanans quidnam symbola visa darent.
Ecce, inquit, cernes, si crastina tempora lucis,
Heinschelius Sponsus, Sponsula vitis erit.
15 Vitis erit, repetens; nam pagina sacra Maritam
Appellat vitem fructibus eximiam.
Talia significans, tenues migravit in auras,
Symbola non linqvens corporis ulla sui.
Haec igitur cum sint rata somnia, Sponse novelle,
20 Laetor, et optando vota secunda fero!
Pronube Christe, fave; sit ut haec conjunctio felix;
Quod voveo, hoc faveo, pectore, voce, fide.
Lypnit. Moravus, p.t. Infor. Aulicus.
53. Adr: Martin Henschelius et Elisabetha Hein – Aut: Joachimus Rachelius (cf. 48)
Tallinn SA, [Tartu UB]
EPITHALAMIUM
Diva pudoricolor, roseis Matuta labellis,
Cujus in aspectu non manet ipsa Venus:
Cui, simul exoreris timido stas pallida vultu
Cynthia, cui cedit Tyndaris ipsa loco:
5 Vis tibi te monstrem pulcerrima, nec Dea, pictam,
Nec speculo, constans quale ministrat aqua?
Non puto, non unquam facies tam lactea lacti est
Quam formae similis vivit ELIZA tuae.
Audiat hoc Titon, praesensque sit arbiter, at ne
10 Erret in amplexu conjugis, ipsa cave.
O fortunatum tota cui nocte dieque
Aurora hac dabitur nec recedente frui!
Ille Deum vitam accipiet, nomenque novellum
Quique erat HENSCHELIVS, nunc puto Gallus erit.
54. Adr: Martin Henschelius et Elisabetha Hein – Aut: Nicolaus Psilander (cf. 48)
Tallinn SA, [Tartu UB]
EPITHALAMIUM
Numen applaudit thalamis maritis:
Ardet Europe, ac Ariadna et Herse.
Vix Homo vitat Veneris recessus,
Gaudia laeta.
5 Docte et HENSCHELI, tua viscera ardent
HEINIA flamma? Venus o venusta
Exta succendit, Roseae genaeque
Lumina torquent.
Haud secus flagras domus ac superba; Et
10 Flagrat accendens velut ipsa Dido:
Flamma communis penetrat subitque
Pectora casta.
Pulcra nascentis medicina sortis;
Mitiget Candor tacitos amores:
15 Vos Ebur plectro celerate Divi
Sollicitare.
Personat votum, resonant Camoenae;
Sacrosancte adsis facilis Jehavah:
Pullulet lectus; Numerosa surgat
20 Copia rerum!
Anno.
HeInIa MartIno; HaeC VInCVLa fIXa tVLIt.[15]
NICOLAUS PSILANDER, Smol. Svecus.
55. Adr: Martin Henschelius et Elisabetha Hein – Aut: Christophorus Kühnius (cf. 48)
Tallinn SA, [Tartu UB]
EPITHALAMIUM
Magna Dei virtus, et cum virtute potestas,
In Patris primi conditione patet:
Quem pulchrum e limo praestanti corpore finxit,
Ipsius et terram subdidit imperio.
5 Insuper et tantis donis cumulavit, ut ipsum
Ornaret forma propria et effigie.
Attamen est factum longe praestantius illud
Quod Clemens cunctos nos regit ipse DEUS:
Adversus stygij flagrantia tela Draconis
10 Conservat tutos, excubiasque gerit.
Hoc Duce procedunt socij connubia lecti:
Hoc Duce, vos castus consociavit Amor.
Vivite: felicem per secula ducite vitam:
Hoc precor: optatis, Christe faveto meis.
Pro connubio felici felix votum gratula-
bundus depromere volebam
S.S. Theol. Stud.
56. Adr: Martin Henschelius et Elisabetha Hein – Aut: Andreas Kosckul (cf. 48)
Tallinn SA, [Tartu UB]
EPITHALAMIUM
Connubio stabili jungit MARTINVS Amicam
Perpulchram, quam nunc HEINIA tecta colunt.
Miror quod Veneres pulcrae, Revalia tecta
Splendida, quas servant, non tenuere sibi!
5 Non mirum est forsan; tu Doctas inter Alumnas
Vixti[16] Dorpati, Sponse venuste, diu?
En Nympham precium Phoebus tibi mittit ELISAM,
Foedere quam firmo jungit Apollo tibi.
Heu quam felix es, ter et amplius esque beatus!
10 Quod Sponsam donat Doctus Apollo Deam!
Eja igitur, felix vivas, o Sponse novelle,
Cum Sponsa Pylios Nestoreosque dies.
Vivite concordes; Natos charosque Nepotes
Cernentes vestrum dulce levamen: Amen.
Haec vobis Neonymphis
voveo et faveo ore
et corde
Jun. Nob.
57. Adr: Johannes Petri Kuuth – Aut: Laurentius Ludenius (Disputatio philosophica de anima rationali et eius facultatibus: quam /.../ in Regia Academia Gustaviana, quae Dorpati est /.../ sub praesidio /…/ Johannis Erici Stregnensis, /.../ ad diem 10. Julij. /.../ submittit Johannes Petri Kuuth, /.../ author et respondens. – Dorpati Livonorum, 1643: Typ. acad.) SKB, UUB, LAB, [Tartu UB]
GRATULATIO
Doctissimo et Ornatiss. Dn. Respondenti.
Per Anagr.
PIO, TU CHRISTE, ANNVE.[17]
Vsque PIO coepto, TV nunc, bonus ANNVE CHRISTE;
Sic labor in laudem desinet ille tuam.
et J.V.D. Poët. C. Juris, Oratoriae
et Poës. P.P. ac p.t. R. Magnificus.
58. Adr: Johannes Petri Kuuth – Aut: Magnus Andreae Hööck (cf. 57)
SKB, UUB, LAB, [Tartu UB]
GRATULATIO
Unquam quid majus poteris tractare, JOHANNES?
Dignis unquam quid feceris hocce opere?
Dum munus narras anima ratione fruentis,
Ejus et officium dante labore notas.
5 Evolvant alij vastissima climata Coeli,
Inspiciant alij Sydera clara poli:
Scrutentur vastas terras, alij maris undas:
De gemmis alij dogmata pulcra ferant:
Observent alij virtutes soepe latentes
10 Herbarum, Lapidum, Stirpis et arboreae.
Tu majus miraris opus; scrutaris amice
Ipsam Animam, nullo tempore quae moritur.
Perge, ut coepisti, meditari scripta Sophorum:
Felix hoc studium nomen ad astra feret.
Ita gratulari voluit
thus, SS. Th. Studiosus.
59. Adr: Johannes Petri Kuuth – Aut: Jonas Pauli Spinckius (cf. 57)
SKB, UUB, LAB, [Tartu UB]
GRATULATIO
Per Anagr.
HIC TU RATIONE PENUS.
Illustrat: dat Magni et Parvi aenigmata Mundi:
Mente dati tranat corpora clara poli,
Lumina Coeli;
5 Oceanum ingentem, flammae et telluris et aurae
Scrutatur molem, et pendenti corpore Nubem;
Fulva metallorum pondera, congeriem
Maximam Aquarum.
Gramina miratur, Cedrum, plantaria viva;
10 Et pecus immensum, fraenorum et nescia bruta;
Et Volucres, et qui piscis in amne natat
Remige pinna.
Tros Anchisiades, Italas res, in Clypeo ceu
Miratur, rerumque ignarus imagine gaudet;
15 Laetitia ac Animae pectus imago replet
Obvia solum:
Sic TV, Iane, Dijs similem HIC RATIONE, age mentem
Excutiens, animamque animo duce; jam PENVS auges;
Nitore ubique ut et HIC TV RATIONE PENVS
20 Fac locupletes.
Amico amiciss. amice amando f.
Bothniensis.
60. Adr: Johannes Petri Kuuth – Aut: Laurentius Ludenius (Prodigium mense Novembri, anno 1643. per Livoniam in coelo spectatorum virorum armatorum; nec non agminis viventium, et ab aquilone vento allatarum, ac ad propugnacula inclytae civitatis Revaliensium, die 17. mensis ejusdem in nivem decidentium Muscarum; /.../ oratione metrica in Regia Academia Gustaviana Adolphina, quae Dorpati /.../ est /.../ die 19. Decemb. anno 1643. publice /.../ recitatum a Johanne Petri Kuuth, /.../ - Dorpati Livonorum, 1643: Lit. acad.) SKB, UUB, Växjö LB, EAB, [Tartu UB]
GRATULATIO
Doctiss. et Ornatiss. Dn. Peroranti.
Per Anagr.
EN, KUUTH/ IN PIO TRAHES!
En o perge, PIO velut IN conamine pergis;
INque PIO mentes omine reque TRAHES.
Quod app.
J.U.D. ac P.P.
61. Adr: Johannes Petri Kuuth – Aut: Jacobus Columbus (cf. 60)
SKB, UUB, Växjö LB, EAB, [Tartu UB]
GRATULATIO
Clangente festinat sonitu dies
Optata Sanctis, sed Reprobis gravis;
Inseret, et Reprobos Avernos
5 Natura monstrat prodigijs datis,
Et praedicat miris valide modis
Quod fabrica orbis defatiscat,
In cineresque soluta vadat.
Dispallida fert Cynthia jam faces:
10 Multum tenebrosis nebulis tegit
Clarumque vultum, lampademque
Phoebus abhinc nitidam reducit.
Immensa grandaevi vada Nerei
Diris procellis praelia concitant;
15 Telluris eversae cavernae
Dant sonitumque tonumque tristem.
Auditur armatus superis chorus
In nubibus ferro truce dimicans;
Muscae advolant magnis catervis
20 Ad Levones hyemem per ipsam.
Praenunciant serae sonitum tubae,
Qui conditos terra revocaverit.
Attolle cordis pulcre ocellos,
Nostra Redemptio jam propinquat.
25 Ergo ligato Prodigium stylo
Dum das, JOHANNES, perplacidum facis
Cunctis opus, quod aggravatos
Sollicitudine sublevabit.
Apollo dexter te et Charites Deae
30 Tollant, futurum mox decus arduum.
Urge perennes hinc labores,
Et patriae columen vigesce.
In felix omen apposuit
62. Adr: Christophorus Kühnius – Aut: Laurentius Ludenius (In abitum /.../ Christophori Kühnii, Riga Livoni, Ph. et SS. Th. st. /.../ e Regia Universitate Gustaviana, quae Dorpati /.../ est /.../ die 17. Julij, anno 1643. in Germaniam euntis; quaevis fausta precantur Musae Embecciades. – Dorpati Livonorum, 1643: Lit. acad.)
EAB, [Tartu UB]
PROPEMPTICON
Per Anag.
HIC, PROH, CHORVS SIT VNVS!
I pede felici, quo te vocat ardua Virtus:
In vnitate munus,
HIC, PROH, CHORVS SIT VNVS.
Quod in felix ausp. s.
PH. et I.V.D. Poë. Cor. Prof. Ord.
63. Adr: Christophorus Kühnius – Aut: Andreas Sandhagen (cf. 62)
EAB, [Tartu UB]
PROPEMPTICON
Angelico stipante choro feliciter ibat,
Isaci soboles, fratris cum cederet irae.
Deduxit Comitem Raphaël, salvumque reduxit,
Reddens incolumem Matri charoque Parenti.
5 Felix Angelica pergas comitante caterva
KÜHNI: Te salvum ducat, salvumque reducat
Sancta cohors; quondam et Patriae Te reddat amatae!
Properante calamo l. mque scr.
Northusanus, Histor. et Pol.
Prof. Ord.
64. Adr: Christophorus Kühnius – Aut: Herman Schwemler (cf. 62)
EAB, [Tartu UB]
PROPEMPTICON
Huc i vita, Salus, bonum perenne!
Huc i pax et amica Honora Amico,
Et nostrae Pieri[18] Vale loquentem,
Tandem condecorare perge, perge!
5 Pandantur lepido benigna Amico:
Promantur lepido secunda Amico,
Franganturque nefanda fata Amico.
Cocytique quiescat unda Amico.
Haec dant vita, salus, bonum perenne:
10 Hoc i munere faustus, i redique.
65. Adr: Christophorus Kühnius– Aut: Sigismundus Panphiliani (cf. 62)
EAB, [Tartu UB]
PROPEMPTICON
Cur Dorpticas amoenas
Relinquis has Camoenas,
5 Venustulas labellis,
Ac blandulas ocellis,
Quae melle dulciores
Nardoque suaviores?
Quo tendis? ad Sorores,
10 Apollinisque honores?
Pergas precor favente
Deo bono, ac volente
En comprecor trophaeon
Ut sit tibi brabeion.
Discedenti hac vovendo ad-
posuit
LIANI, Lupnicen. Moravus, p.t.
Infor. Aul.
66. Adr: Christophorus Kühnius – Aut: Nicolaus Psilander (cf. 62)
EAB, [Tartu UB]
PROPEMPTICON
Nostris Camaenis cum Valedixeris,
CÜHNI, premas quam, CHRISTOPHORE, orbitam,
Christum ferens in pectore? Audax
Nomine et omine mi videris,
5 Audax renides, dum Eusebiae vias
Et rura linquens Thespiadum Chori,
In tesqua Sylvani gradum fers;
Dum Dryadesque colis Sorores,
Audax renides, dum Aeolij maris
10 Credis Gemellis vivida stamina:
Audax tumentes Filias pol
Qui Thetidos petis undulatas;
Sed Gratiarum es tactus amoribus
Flores legentum, et candida Lilia
15 Convallium, ac nectentium herbas
Felix iter sit, faustus et ambules;
Structis corollis in Patriam redi
Christo paratum pectus; Audax
20 Nomine et omine perbeato.
Quod animitus prec.
67. Adr: Christophorus Kühnius – Aut: Joachimus Rachelius (cf. 62)
EAB, [Tartu UB]
PROPEMPTICON
cum Dorpato discessurus, publice de Praede-
stinatione disputares.
Hoc hoc Athenas est adire Musicas,
Hoc, si quid apte judicamus, est opus
Laboriosae mentis, atque industriae,
Non cymbia inter Persicasve amystides,
5 Aut helluosae congios Germaniae
Florem fugacis enecare temporis:
Non voce rauca provocare stentoras,
Non ense stricto vulnerare compita
Vrbis quieta civiumque limina:
10 Non ad duelli soevientis aleam
Atroce vultu, mente penitus langvida
Iurare mortem vel sibi, vel alteri:
Non in latebra cum suburbanis lupis,
Rumore foedo, Patriae fastidio,
15 Ridente lippo, conscijs censoribus
Jugulare famam, cumque fama quicqvid est
Vsquam bonorum, et jura Clementis Dei.
Tibi cor est, Amice, mens, inquam, tibi est,
Amice KVHNI, tu modestior. Simul
20 Aurora roseis prodit e cubilibus:
Cum se profundo Phaebus abdit aequore,
Haud in profanis abditus iaces sacris,
Sed illa summi verba scrutaris Dei
Contraque fatum Zinglianum disputas,
25 Domi quietus, publice miraculo.
Hoc, hoc Athenas est adire Musicas,
Hoc, si quid apte judicamus, est pias:
Adire laudes, cumque laude sydera.
Dithmarsus.
68. Adr: Christophorus Kühnius – Aut: Jacobus Pinnerius (cf. 62)
EAB, [Tartu UB]
PROPEMPTICON
Dorpaticas Musas quia jam rellinquere tentas,
Altaque Teutoniae scandere tecta cupis:
I bene, quo virtus tua te vocat, i pede fausto,
Qua scatet Aonijs Varnus amoenus agris.
5 Ito audax, positam quo possis prendere metam,
Et patrios rursus sanus adire Lares.
Amoris fraterni ergo ita
Gratulatur
Vngarus L.S.
69. Adr: Christophorus Kühnius – Aut: I. J. Kirstenius (cf. 62) EAB, [Tartu UB]
PROPEMPTICON
Carmen Propempticon
Genere Dactylico.
Discupis, alter ego, capere
Augmina sub scrobe nunc alia
5 Augmina sollicitae Patriae.
Tempore jam gradiente ferax
Planta novo melius sub agro
Quaerit ali, docilis varia
Reddere fruge sui cupidos.
10 Sic tua mens amat in varias
Latius ire plagas, alio
Crescere laeta Solo cupiens,
Plantula viribus haud proprijs
15 Vult olitoris agi solita.
Tu proprio refugis Patrium
Arbitrio variare solum:
Cumque solo solium nitidae
Pallados: imperat ipse Pater
20 Dulcis abire sinu Patriae
Plantula temporis articulos,
Quos decoravit odoriferi
Munere floris amor Zephyri:
25 Hoc quoque vere novo Patriam
Linquere quaeris Humum similis
Arboribus, similis Platano
Obsequiosa, precor, videas
30 Insitionis opus! Videas
Omine cuncta frui placito.
Plantula non timeat stimulos,
Mortis et interitum; rapidae
Invidia careat Boreae:
35 Sed valeat, vigeat, vireat.
Fruge DEVS meliore tuum
Ingenium, Geniumque beet.
Fruge beet meliore, suo
40 Laudis honore, simul celebrans
Munere gratidicus meritis.
Qui sine fruge suos validi
Temporis articulus peragit,
Quomodo frugi HOMO, cui placeat?
70. Adr: Christophorus Kühnius – Aut: David Wehlanus (cf. 62) EAB, [Tartu UB]
PROPEMPTICON
Dorpatenses Musas dum tu nunc linqvis, Amice,
Perfodit pectus nil nisi triste meum.
Indoleo sane quod tu discedere gestis,
Et pariter mecum turba novena gemit?
5 Ast dum fata volunt; bona verba precantia fundo:
Sit coeptum foelix prosperitate pia.
I pede foelici, quo te vocat optima virtus:
Per mare per terram sit data fausta via.
Sit comes Omnipotens Deus, est cui summa potestas;
10 Te quoque sperata conditione beet.
Ita animo et calamo Amicum
suum concomitari voluit
DAVID WEHLA<.>VS,[19]
71. Adr: Christophorus Kühnius – Aut: Laurentius Ludenius (Oratoriae ecclesiasticae delineatio: quae, /.../ in Regia Academia Gustaviana Adolphina, quae Dorpati /.../ est /.../ die 20. Decemb. anno 1643. /.../ disputationis exercitio, publice /.../ committebatur, praeside Laurentio Ludenio, /.../ respondente Christophoro Kühnio, /.../ - Dorpati Livonorum, 1643: Lit. acad.) EAB, [Tartu UB]
GRATULATIO
Praestantissimo Dn. Respondenti.
Per Anagr.
PROH, KÜHNI, CHRISTO USUS!
Sic PROH Delicium Eusebiae, Doctissime KÜHNI,
Tu CHRISTO et CHRISTI auxilio feliciter VSVS:
Et totus CHRISTO Studiorum militat VSVS.
In felix omen app.
J.U.D. ac P.P.
72. Adr: Christophorus Kühnius – Aut: Johannes Bruggemann (cf. 71)
EAB, [Tartu UB]
GRATULATIO
Aonij fontis Soboles, tu carmina poscis:
Si possem, vellem scribere; Musa vetat.
Quare quod bene facundis alij arte precantur
Versibus, hoc trinis expediam ipse tibi:
5 Perge manu docta Doctorum volvere libros:
Magna dabit studij praemia, perge, labor.
Haecce paucula suo Fratri et Affini medullitus
dilecto app.
Johannes Brüggeman, Curl. Cand.
73. Adr: Christophorus Kühnius – Aut: Johannes Kerstens (cf. 71) EAB, [Tartu UB]
GRATULATIO
Avdes Tune iterum felix invisere Musas
Dorpaticas, reducesque iterum exantlare labores
Kühni? ut auspicio tentas; bona sunt nova, Sparta
Imminet in Patria tibi, ut opto; tu modo Musis
5 Invigila post hac, ut fecisti hactenus aeque:
Scit sacrum bene compensare Iehova laborem.
Haecce suo Kühnio Fratri dilecto app.
74. Adr: Christophorus Kühnius – Aut: Joachimus Rachelius (cf. 71)
EAB, [Tartu UB]
GRATULATIO
Res est Concio nullius laboris,
Inquis Marcule, quando tu libellos
Hinc illinc petis, et labore nullo
Pantheram catulo, histricem leone,
5 Muscam Rhinocerote, lynce talpam,
Diversissima pessime maritas,
Et coram populo supina tollis
Ora, stentoreo fremens boatu.
Quin tu perlegis hancce Kühnianam,
10 O mi Marcule, Disputationem?
Quin tu, quod jubet Author, ipse tentas?
Aut sim pessimus omnium ipse, vel tu
Facundissimus omnium Magister,
Ni mecum steteris, beatiore
15 Dicens judicio: Bene est, Racheli
Res est Concio maximi laboris.
Joachimus Rachelius, Dithmarsus.
75. Adr: Christophorus Kühnius – Aut: Christophorus Kirstenius (cf. 71)
EAB, [Tartu UB]
GRATULATIO
Qui gaudes caput ingenuas efferre per artes,
KÜHNI, Musarum gratia, jugis Amor:
Japeti audaci prognatus stemmate prisco es,
Ut video, tentas ire redire viam.
5 Audes audacter nostris valedicere Musis,
Audes audacter rursus adire Deas.
Ipse Redux ornare novo conamine Musas
Incipis, hic sacris invigilas thesibus.
Audes; rite Dei verbum inculcare popello:
10 Ardua res vere est, et pietatis opus.
Audentem laudo; audenti, sine fine Jehova
Vendidit atque dedit cuncta labore bona.
Joh. Christophorus Kirstenius, LL. Stud.
76. Adr: Christophorus Kühnius – Aut: Philippus Halbach (cf. 71) EAB, [Tartu UB]
GRATULATIO
Sic est Orator gratus, qui candida veri
Argumenta docet, qui facienda facit!
Fungeris officio, KÜHNI, Oratoris amici,
Ut labor ipse docet, Palladiumque probat.
5 I bene, quo sanctae ducit Facundia lingvae,
Et crescat Christi gloria, laus et honor.
77. Adr: Matthaeus Liebeheer – Aut: Andreas Sandhagen (Disputatio de specibus reipublicae, quam /.../ in Academia Gustaviana praeside /.../ Andrea Sandhagen, /.../ disputationi subjicit ad diem < > Junij /.../ aut. et resp. Matthaeus Liebeheer, /.../ - Dorpati Livonorum, 1643: Typ. acad.) LAB, EAB, [Tartu UB]
GRATULATIO
Ad
DN. RESPONDENTEM
de Speciebus Reipublicae
disputantem
PROSFWNHSEIS.
Littora ubi Levonum felice Philostratus aura
Attigerat, vidit Mars, et sic protinus infit:
Hic meus est, ni forte gerat nullo omine Nomen.
Audijt excelsi Dux hoc Heliconis; et Erras,
5 Frater, ait: Meus est; dudum mea castra seqvutus
Strenuus expectat miles dehinc justa brabea.
Nec mora; ne nudis Martem superaret Apollo
Verbis, ipsus adest, meditata Philostratus arte
Subjiciens oculis clarorum effata Sophorum,
10 Qui regere imperio populos docuere per orbem.
Hiscere non audet Mars contra: at Phoebus alumno
Praemia digna parat: quod idem voluere Camoenae.
Conatum Amico gratulatus
scr.
GEN Disput. Praeses.
78. Adr: Matthaeus Liebeheer – Aut: Adrianus Verginius (cf. 77)
LAB, EAB, [Tartu UB]
GRATULATIO
Arte et Marte sibi Juvenis-vir semper honorem
Et laudem summam conciliare potest.
Arte et Marte cluit noster Matthaeus amicus:
Hinc ipsi accrescit gloria, laus et honor.
5 Hunc Vrbs Riga colit, laudant Dorpatica tecta:
Gratulor ergo illi, faustaque cuncta precor.
Quo pede coepisti pergas, rogo, dulcis amice,
Gaudebunt fratres, patria, chara parens.
Festinanter apponebat
Pomeranus, Ecclesiae Nuggensis prope
Dorpat. Past. et Facult. Th. Adjunct.
79. Adr: Matthaeus Liebeheer – Aut: Jodocus Andreas Hiltebrandt (cf. 76)
LAB, EAB, [Tartu UB]
GRATULATIO
Prisci quod memorant fasti, quod foedera legum;
Civicus hoc codex ad sua sana citat.
Illius elato hinc surgit praestantia vultu,
Namque in se quicquid possidet Orbis, habet.
5 Ex haec materiem rerum farragine captas,
Et genij vires promis, Amice, Tui.
Quid sit enim, ac quo<r>uplex facet hic Moderaminis ordo
Catholici, compto suaviter ore refers.
O felix animi, solers qui talia versas,
10 Omnigena quae Te cognitione beant.
Sic juvat aethereos contingere vertice montes.
Nomen et a pigro dissociare solo.
Testandi amoris et benevolentiae ergo
Amico suo svavissimo accinebat
Philiater.
80. Adr: Laurentius Ludenius – Aut: Petrus Ludenius (De viro practico, deque mediis ad vitam practicam deducentibus liber; quem, /.../ in Regia Universitate Gustaviana Adolphina, quae Dorpati /.../ est /.../ eruditiss. iuvenibus, practicarumque rerum studiosissimis, /.../ publicis disquisitionibus ad disputandum proponebat Laurentius Ludenius, /.../ - Dorpati Livonorum, 1643: Typ. acad.)
SKB, H, EAB, [Tartu UB]
GRATULATIO
Clarissimo et Consultissimo Viro
DN. LAVRENTIO LVDENIO, PH. et J. V. D.
Poë. Cor. et in Regia GUSTAVIana-
ADOLPHIna Professori Celeberrimo.
Evnomiae et Sophiae Doctor, Divine Poëta,
Delicium patrij, Frater amande, soli!
Dante Deo, cito vitales susceperit auras
Egregio felix PRACTICUS ingenio!
5 Scilicet in CHRISTO factus novus, atque vetusta
Carne illa exutus, vivet ubique Deo.
Vivet ubique Sibi; Virtutis robore pollens
Vivet ubique Pijs; vivet ubique Probis.
I bene, coelestis quo te Sapientia ducit;
10 Vivemus CHRISTO tempus in omne Deo.
Vivemus Nobis, Nostris, Nostratibus aeque:
Et quam vivemus Vita perennis erit.
Ita Fratri suo Eminentissimo acc.
PETRUS LVDENIVS, Pastor Ecclesiae Christi in
Weddingståde / Borealis Dithmarsiae Superint.
et Protosynedrij Holsatici Adsessor.
81. Adr: Laurentius Ludenius – Aut: Melchior Ludenius (cf.80)
SKB, H, EAB, [Tartu UB]
GRATULATIO
Virtutis Vera custos, rigidusque satelles
PRACTICVS, ut scripta candidiore doces,
Adversis probitas placidisque exercita rebus,
Omni materiam tempore laudis habet.
5 Aevi vive Decus, Charitum Flos: vixerit aequam
Vsque tuis vitam PRACTICVS auspicijs.
Quod Germano suo Colendiss. sc.
82. Adr: Andreas Megalinus – Aut: Laurentius Ludenius (Disputatio physica de natura, quam /.../ in Regia Academia Gustaviana, quae est Dorpati /.../ sub praesidio /.../ Johannis Erici Stregnensis, /.../ pro summo in philosophia gradu consequendo publicae ventilationi subjicit Andreas Megalinus Agundarydensis, /.../ ad diem < > Septemb. /.../ - Dorpati Livonorum, 1643: Typ. acad.) SKB, UUB, [Tartu UB]
GRATULATIO
Praestantissimo Dn. Respondenti.
Per Anagr.
ARDENS, MAGNA VELIS!
ARDENS, MAGNA VELIS! Dixi dicenda. Jehova
Auspice, sit felix Nomen et Omen. Habes.
In felix Auspicium sc.
LAURENTIUS LUDENIUS, PH. et J.U.
D. ac Prof. pro t. R.
83. Adr: Andreas Megalinus – Aut: Andreas Virginius (cf. 82)
SKB, UUB, [Tartu UB]
GRATULATIO
Vernales si non flores produxerit arbos,
Non autumnali foenore dives erit.
Fallor: an et primis nisi se quis credit ab annis
Musis, haud fructus sera senecta feret?
5 Conatus, MEGALINE, tuus pro tempore testis;
A pueris Musas excolis ingenuas.
Hinc te jam juvenem statuit decorare Minerva
Immarcescibili frondis honore novae.
Gratulor inde tibi, et voveo bona multa senectae:
10 Hinc Christo et Musis vive vireque diu!
Sic gratulabatur
D. et P.P.
84. Adr: Andreas Megalinus – Aut: Ingemarus Petri Smetander (cf. 82)
SKB, UUB, [Tartu UB]
GRATULATIO
Qvem Natura sagax voluit sua limina adire,
Moribus vita finxit amabiliter:
Et quem formarunt magni infractique labores:
Is referet quondam digna brabeja Viro.
5 Macte animis! tanto conamine macte! Bonum sit
Quod Natura, et Mos, et labor ipse dedit.
In felix auspicium sc. ab
Westro Gotho.
85. Adr: Andreas Megalinus – Aut: Nicolaus Psilander (cf. 82)
SKB, UUB, [Tartu UB]
GRATULATIO
'Anagram.
RES MAGNA; INDE LAVS.
RES MAGNA est Heliconiadum conscendere muros!
INDE tibi Laurus, LAUSque beata manet.
Gratulabundus adj.
86. Adr: Andreas Megalinus – Aut: Petrus Johannis Angelstadius (cf. 82)
SKB, UUB, [Tartu UB]
GRATULATIO
Ut bene certanti dantur sperata brabeja;
Ac ornat fortem parta corona virum:
Sic modo; sit faustum et felix; MEGALINVS honores
Acceptat, spondet quos pia Musa pijs.
5 In Patriam tendit, Patriae sit clarus alumnus,
Pieridum vireat gloria prima diu.
Sit Christo charus, charusque parentibus aequis,
Et studio prosit dexteriore bonis.
Sympatriotae et Contubernali suo Svaviss.
ita gratulatur
87. Adr: Petrus L. Schonbergius – Aut: Johannes Erici Stregnensis (Disputatio physico-astronomica de stellis; quam /.../ in Regia Academia Gustaviana, quae Dorpati est /.../ 22. Aprilis, anno 1642. /.../ publice /.../ praeside /.../ Johanne Erici Stregnensi, /.../ proponit Petrus L. Schonbergius, /.../ - Dorpati Livonorum, 1643: Typ. acad.) SKB, LAB, [Tartu UB]
GRATULATIO
Humanissimo et Doctissimo Juveni, Dn.
BERGIO, thesium harum Authori, ita
gratulari volui.
PETRE, Novenarum pulcerrima Fama Sororum,
Vraniae Soboles ingeniosa Sacrae:
Sic, velut Arctophylax, Telum, Cepheusque, Lyraeque,
Exornent Coelum mente docente refers:
5 Saturnus, Sol, Luna, Venus, Mars, Juppiter, Hermes,
Vt flectant cursus re meliore doces.
Gratulor ingenio, mihi toto gaudeo sensu;
Fata precor votis candidiora tuis.
Perge Poli summi pulcros numerare recessus,
10 Et nomen Coelis re potiore notas.
Astronom. et Phys. P.P.
88. Adr: Petrus L. Schonbergius – Aut: Andreas Laurentii Flojerus (cf. 87)
SKB, LAB, [Tartu UB]
GRATULATIO
O PETRE dulcis fonticolarum Amor,
Tu Alumne Phoebi, Pieridumque flos
Non quaeris uvas nunc opimas
Sardiniae[20] segetis feracis:
5 Non aestuosae grata Calabriae
Armenta, non aurum, aut ebur Indicum,
Mordet aqua taciturnus amnis.
Sed quaeritas encomia candida
10 Laudis, pia almi munera Apollinis,
Motumque stellarum micantem,
Sidera coetera rite monstras;
O perge Frater, Pegasidum chorus
Plantae tuae Talaria et induat
15 Hinc te Tagi pingatque Phoebus
Auricoloribus Ecce lymphis.
Animitus gratul.
Smol.
89. Adr: Benedictus Jonae Schreberg – Aut: Laurentius Ludenius (Oratio in salutiferam Domini et Salvatoris nostri Jesu Christi nativitatem: quae /.../ in Regia Academia Gustaviana, quae Dorpati /.../ est /.../ 25. Decembris. anno 1642. publice /.../ habebatur a Benedicto Jonae Schrebergio, /.../ - Dorpati, 1643: Typ. acad.)
SKB, H, [Tartu UB]
GRATULATIO
Doctiss. et Ornatiss. Dn. Peroranti.
BENEDICTUS JONAE SCHREBERGIUS;
Per Anagr.
NAE, CHRISTE, UBI BENEDICES, SURGO.
CHRISTE, VBI tu studijs BENEDICES, NAE bene SVRGO:
O BENEDIC studijs, JESVLE CHRISTE, meis.
In felix omen ap.
I.V.D. et Prof.
90. Adr: Benedictus Jonae Schreberg – Aut: Nicolaus Psilander (cf. 89)
SKB, H, [Tartu UB]
GRATULATIO
Cunctas licet Deus crearit umbras et
Luces; Diem tamen micantibus cunis
Christi sacratum, singulariter fecit.
Est Hosti ademptum jus, Salusque facta orbis
5 Quo convenit, moeror pium ut relaxetur.
Attentior quod dum revolvis et versas
Oratione, SCHREBERGI, probe compta
Satisfacis festo; Pio Choro Calcar
Dans pensitandi mente Gratijs plena
10 Quae orbi tulit Christus bona. Haec recens nato
JESU placent; Et laude digna censentur.
Quae pauca gratulanda subscripsi
91. Adr: Jacobus Andreae Tyblaeus – Aut: Laurentius Ludenius (In salutiferam nativitatem Domini et Salvatoris nostri Jesu Christi, oratio, quam /.../ in Regia Academia Gustaviana, quae Dorpati /.../ est /.../ 25. Dec. anno 1643. /.../ publice /.../ enarrabat Jacobus Andreae Tyblaeus, /.../ - Dorpati, 1643: Lit. acad.)
SKB, UUB, H, [Tartu UB]
GRATULATIO
Doctissimo Dn. Peroranti.
Per Anagr.
I DEO CARUS, UT HYBLAEA BEANS.
Usque DEO I CARVS: Christo Duce et Auspice Christo,
Sis HYBLAEA BEANS VT apis! Tu I sidere fausto.
Quod in felix omen app.
J.U.D. ac P.P.
92. Adr: Jacobus Andreae Tyblaeus – Aut: Johannes Petri Kuuth (cf. 91)
SKB, UUB, H, [Tartu UB]
GRATULATIO
Laeta dies oritur, castae qua matris ab aluo
Christus, sub forma paupere, natus homo est.
Scilicet ut veteris solvens contagia culpae,
Justitiae certas traderet ipse vias:
5 Et mortale genus revocans e faucibus Orci
Deleret meritis crimina nostra suis.
Hanc celebrare, JACOBE, pio te carmine lucem
Convenit, et sacra digna referre die.
Non haec Piërides dictant, non fautor Apollo,
10 Non haec Castaliae suggerit humor aquae:
Sed Pater Omnipotens, et lucida Patris Imago
Natus, et amborum Gratia dulcis Amor.
Dulcis Amor, divumque potens hominumque voluptas
Qui regit afflatu pectora casta suo.
15 Perge igitur: coeptis, mi dilectissime Amice,
Suda: Sic studium Numina sancta beant.
Fil…aj›neka œgraye
Sudermannus.
93. Adr: Jacobus Andreae Tyblaeus – Aut: Petrus Andreae Falck (cf. 91)
SKB, UUB, H, [Tartu UB]
GRATULATIO
Ingenium monstras, Musarum candide Cultor,
O TYBLAEE tuum, dum sacra facta canis.
Inquis: quod Medicus noster vitaeque Magister
Coelitus exoritur, Virgine natus Homo:
5 Usque tuis faveat coeptis Salvator Jësus,
Sacro sic studio praemia digna feres.
Quod in felix omen vovebat
94. Adr: Jacobus Andreae Tyblaeus – Aut: Andreas Arvidi Stregnensis (cf. 91)
SKB, UUB, H, [Tartu UB]
GRATULATIO
Sanctus qui relegit magno fervore Camoenas,
Non ripae steriles is vomere sulcat arenas;
Sed segetum pingves cito carpit laetus aristas,
Et cumulat facili Thesaurum sorte perennem.
5 Mente igitur laeta gaude simul atque triumpha,
Quando, Jacobe, legis pulchro conamine sacra.
Incoeptis studiis his sic incumbere perge,
Quo valeas sanctis conatibus ire per alta.
Amoris testificandi gratia scribebat
95. Adr: Petrus Caroli Undenius – Aut: Johannes Erici Stregnensis (Disputatio de natura et constitutione scientiae naturalis; quam /.../ in Regia Academia Gustaviana, quae Dorpati /.../ est /.../ praeside /.../ Johanne Erici Stregnensi, /.../ publicae ventilationi submittebat Petrus Caroli Undenius, /.../ author et respondens. /.../ ad diem 3. Iunij, /.../ - Dorpati Livonorum, 1643: Typ. acad.) SKB, LAB, [Tartu UB]
GRATULATIO
Praestantissimo et Doctissimo Viro-Juveni,
harum Authori et defensori, ita gratulari volui.
Et rerum causas, et quae Natura doceret,
Doctis tu thesibus, candide Petre, doces.
Perge, velut pergis. Naturae docta latentis
Commoda, discretis explicuisse modis:
5 Perge, decus pulcrum est Physices proponere leges,
Et Deus ut mundi temperet arte domum.
Astronom. et physic. Prof. pub.
96. Adr: Petrus Caroli Undenius – Aut: Andreas Koschull Junior (cf. 95)
SKB, LAB, [Tartu UB]
GRATULATIO
Per Anagr.
INDE PVTO LVCRANS VIRES.
Ubera Castalidum sugis Doctissime Petre,
Es LUCRANS VIRES INDE subinde PUTO.
Quippe pio versas dum tu conamine libros,
Egregios fructus Phoebus Apollo dabit.
5 Perge igitur felix Physices cognoscere causas
Contemplans, totus quicquid hic orbis habet.
Haec amoris et honoris ergo apposuit
Nobilis.
[1] JunI H
[2] Cf. 1636.14; 1641.11; 1642.22-24; 1643.21; 1644.4; 1645.13; 1646.4; 1647.17; 1648.12-13; 1649.16.
[3] Idem 1636.14; 1644.4; 1645.13; 1646.4; 1647.17; 1648.13; 1649.16. Cf. 1641.11; 1642.22-24; 1643.19-20; 1648.12.
[4] seclo edd metri causa
[5] cinglum edd metri causa
[6] Cf. editio et commentarium: A. Saareste, A.R. Cederberg, Valik Eesti kirjakeele vanemaid mälestisi A. 1524-1739. Akadeemilise Emakeele Seltsi Toimetised XVI. Tartu, 1925-1931, 360; V. Alttoa, A.Valmet, 17. sajandi ja 18. sajandi alguse eestikeelne juhuluule. Tallinn: Eesti Raamat 1973, 44; Editio in: E.-L. Jaanson, Tartu Ülikooli trükikoda 1632-1710. Ajalugu ja trükiste bibliograafia. Tartu:Tartu Ülikooli Raamatukogu 2000, 155.
[7] Chronostichon annum 1643 exhibens.
[8] Chronostichon annum 1643 exhibens.
[9] agens R : textus corruptus H
[10] Anagramma non recte constructum.
[11] Chronostichon annum 1643 exhibens.
[12] Idem 1636.25; 1643.47; 1644.15; 1645.47; 1646.19; 1647.37; 1648.25; 1649.22.
[13] Idem 1636.25; 1643.46; 1644.15; 1645.47; 1646.19; 1647.37; 1648.25; 1649.22.
[14] junxti SA metri causa
[15] Chronostichon annum 1643 exhibens.
[16] vixti SA metri causa
[17] Anagramma non recte constructum.
[18] Pieri T : rectius Pieridi
[19] Textus corruptus T : Wehlanus Jaanson 2000 nr. 491
[20] Sardaniae edd : Sardiniae corr imitationis causa