1645
1. Adr: Petrus Johannis Angelstadius – Aut: Laurentius Ludenius (In octo libros Physic. Aristot. Perˆ tÁj fusikÁj ¢kro£sewj, sive de naturali auscultatione disputatio vigesima quinta, continens nobiliores notas et quaestiones cap. 6. et 7. lib. 3. a text. 56. usque ad text. 67. Quam in Regia Academia Dorpatensi /.../ proponit et publicae disputationi subjicit /.../ Johannes Erici Stregnensis /.../ respondente Petro Johannis Angelstadio, /.../ die <7. Martij 1646> Aug. 1645. /.../. Dorpati Livonorum, 1645: J. Vogelius) SKB, H, [Tartu UB]
GRATULATIO
Doctiss. et Ornatiss. Dn. Respondenti:
PETRUS ANGELSTADIUS:
Per Anag.
PRIUS ANGELUS ADSTET!
PETRE, quid acturus, PRIUS o pius ANGELUS ADSTET!
Et labor in Domino deliciosus erit.
Quod in felix omen app.
Laurentius Ludenius, Ph. et J.U.D.
Poët. Cor. et P.P.
2. Adr: Petrus Johannis Angelstadius – Aut: M. Haquinus Platinus (cf. 1)
SKB, H, [Tartu UB]
GRATULATIO
PETRE, tuum laudo conatum; Praeside Christo,
Excolis in Physico dum studio ingenium.
Pulcrum est, solertis Naturae noscere causas,
Et quaevis Regio quicquid in orbe ferat:
5 Quidque ferat Lunae facies mutata subinde;
Quidque Planetarum mobilis ortus agat.
Infinita Dei bonitas! miracula magna!
Perge: tuus longum continuetur honor.
Amoris E. app.
Smoland.
3. Adr: Claudius Olai Argillander – Aut: Laurentius Ludenius (De Dei bonitate oratio: quam /.../ in Regia Academia Gustaviana Adolphina, quae Dorpati /.../ est /.../ die 18. Decemb. an. 1644. publice /.../ enarrabat Claudius Olai Argillander /.../. Dorpati, 1645: J. Vogelius) SKB, UUB, Karlstad StB, [Tartu UB]
GRATULATIO
Doctiss. et Ornatiss. Dn. Peroranti.
Per Anagr.
CLAUDI, RE NUDA ARGILLA SOLI!
CLAUDI, ARGILLA SOLI RE NUDA Homo! Dixeris autem,
Argillam hanc Bonitas tollit ad astra Dei.
Quod appon.
LAURENTIUS LUDENIUS, J.U.D. et P.P.
4. Adr: Claudius Olai Argillander – Aut: Michael Savonius (cf. 3)
SKB, UUB, Karlstad StB, [Tartu UB]
GRATULATIO
Sic Opifex Mundi, rerum cui summa potestas,
Divina terras pro Bonitate regit!
Donat, praesentis vitae quibus indiget usus;
Coelestique homines prosperitate beat.
5 Felix, o CLAVDI, qui Numinis ardua narras
Facta! diu narres, quae Bonitatis, opes.
Ita app.
Profess. Log. et Ethic.
5. Adr: Claudius Olai Argillander – Aut: Torerus Erici Odhelius (cf. 3)
SKB, UUB, Karlstad StB, [Tartu UB]
GRATULATIO
Ultima non Laus est, pectus coluisse per artes:
Vltima? vix virtus altius ire potest.
Conatum idcirco positum laudoque proboque,
Intras dum magni publica scamna Loci:
5 Scilicet optatae commonstras flumine Lingvae,
Gratia quanta Dei crescat in orbe dato.
Demonstrant alti stellata palatia Coeli,
Atque elementa probant; aethera, terra, probant!
Mortales narrant, et cuncta creata: Loqvuntur
10 Quae Mare, quae tellus, quae polus altus habet.
Acriter incoepto sic tramite currere perge;
Et faveat studiis Gratia summa tuis.
Amoris et favoris contestandi causa scribebat
TORERUS ERICI ODHELIUS, W-Goth.
6. Adr: Claudius Olai Argillander – Aut: Jacobus Columbus (cf. 3)
SKB, UUB, Karlstad StB, [Tartu UB]
GRATULATIO
Parodia Horatiana ex lib 4. Carm. Ode 3.
Mortalem placido Flamine foverit,
Illum non sitis improba
Torrebit Cinyrae, non Semeles Puer
5 Curru ducet amabili
Vesanum, nec eum Cypria morbidis
Transfixum pharetris Dea.
Quod Nymphae tumidas pertulerit minas,
Vexabit variis modis.
10 Sed quae Sacra ferunt Semina Codices
Doctum et Mnemosynes genus
Tollent eximio dogmate nobilem.
Nymphae Pierij ordinis
Dignantur Juvenes inter Apollonis
15 Magnam ponere eum facem,
Et sic dente minus roditur invido.
O Summi Bonitas Dei,
Recto quae modulo munera dividis;
O fractis quoque mentibus
20 Dimissura ferum jam Bonitas scelus.
Totum muneris hoc Dei est,
Orbus quod vitiis coelica gaudia
Ducit cum superis Choris,
Quod scribis placet, et, si placeo, lubet.
Scripta a
Gen. et Illust. Gub. Rig. Alumno,
SS. Theol. Stud.
7. Adr: Claudius Olai Argillander – Aut: Jonas Johannis Scarensis (cf. 3)
SKB, UUB, Karlstad StB, [Tartu UB]
GRATULATIO
Daedala apis, veluti liquidas se attollit in auras
Remigio rapido,
Nec non nobilium perlustrat germina florum
Dulcia mella legens.
5 Aonidum Cultor sic et, dexterrime CLAUDI,
Ingenij trutina
Haud tantum quaeris, quae pronascuntur in hortis
Germina Thespiadum,
Sed quoque conquiris flores e Codice Sacro,
10 Oreque mellifluo
E Cathedra celsa, linguaque profaris eosdem
Flexanimi et celeri.
Pergere ne cesses; vere tibi praemia larga
Praeses Apollo dabit.
Svecus
8. Adr: Johannes Henrici Aridlander – Aut: Laurentius Ludenius (De vero Dei timore oratio: quam /.../ in Regia Academia Gustaviana Adolphina, quae Dorpati /.../ est /.../ die 19. Novemb. an. 1645. publice /.../ enarrabat Johannes Henrici Aridlander, /.../. Dorpati, 1645: J. Vogelius) SKB, UUB, Växjö LB, Karlstad StB, [Tartu UB]
GRATULATIO
Doctiss. et Ornatiss. Dn. Peroranti.
Per Anag.
IN DEO RENIDE: HINC ALIIS NARRA.
HINC ALIIS NARRA, rite Timete Deum.
Ita app.
Laurentius Ludenius, Ph. et J.U.D.
ac Prof. Publ.
9. Adr: Johannes Henrici Aridlander – Aut: Abrahamus G. Thauvonius (cf. 8)
SKB, UUB, Växjö LB, Karlstad StB, [Tartu UB]
GRATULATIO
O nimium felix, atque omni ex parte beatus
Rite vocandus;
Delicium Patriae nostrae et pars docta Lycei,
5 Nam Probitas decorat te aevo rarissima nostro,
Sic Pietasque:
Aonides, nec non Musarum antistes Apollo
Te, Patriota,
Ingenio relevare polito et moribus amplis
10 En voluerunt.
Hoc praesens animi monstrat conatus abunde;
Quando timore
De vero Domini praeconia farier orsus
Ore diserto.
15 Macte animis! dotes tantas fervente calore
Excole laetus;
Inde decus Patriae, Tibi, mox Genitoribus addet
Culta Minerva.
Honoris et amoris E.
Ornatiss. Dn. Peroranti Patr.
dil. app.
AustroFinl.
10. Adr: Johannes Henrici Aridlander – Aut: Andreas I. Limacius (cf. 8)
SKB, UUB, Växjö LB, Karlstad StB, [Tartu UB]
GRATULATIO
Per Anag.
EN ALTE RADIANS NITOR.
Qui RADIANS cupit esse NITOR terraeque Polique;
Hic metuet semper Numina sancta Poli.
EN
ALTE RADIANS NITOR es tu, docte JOANNES;
Dum
populum, Numen rite timere, doces.
5 Nitere tu nisu, summum venerare Tonantem;
Sic ALTE RADIANS sis Maneasque NITOR.
Sic Conterraneo suo gratulatur
11. Adr: Johannes Henrici Aridlander – Aut: Johannes J. Schütz (cf. 8)
SKB, UUB, Växjö LB, Karlstad StB, [Tartu UB]
GRATULATIO
Per Anag.
1. NONNE HILARIS ARDEAT?
2. AN NON HILARIS REDEAT?
Qui Dominum usque timet toto de pectore; NONNE
ARDEAT ille HILARIS dexteriore modo?
JOHANNES Domini est flagrans ardente Timore;
ANNE HILARIS REDEAT? tutus ubique meat.
Gratulans adjicere voluit
Kexhol. Carelius.
12. Adr: Benedictus Cassiander – Aut: Nicolaus Psilander (Disputatio theologica in caput duodecimum a v. 37. usque ad finem, D. evangelistae Iohannis selectissimas notas exhibens, in Regia Academia Dorpatensi publicae censurae subjicietur, praeside Andrea Virginio, /.../ respondente Benedicto Cassiandro, /…/ die <27. Februar.> Januar. anni 1646. – Dorpati Livonorum, 1645: J. Vogelius)
Växjö LB, BRAN, [Tartu UB]
GRATULATIO
Praestantissimo et Literatissimo
Dn. Respondenti:
'AnagrammatizÒmenoj
1. EN CANDIDUS ES! CERTABIS,
2. AC CASSIDES RENIDEBUNT.
EN CASSIANDER, CANDIDVS ES! Viri
Te pervicaces opperiuntur hic:
Stant hic Apellae increduli, stant
Hic operato opere et superbi.
5 CERTABIS his cum, candidioribus
Auro triumphans CASSIDIBVS pugil.
Persta, Ac RENIDEBVNT in axe
Perpetuo Armaque CASSIDESque.
Amico suo syncero, Fratris loco
prosequendo, app. app.
13. Adr: Christina – Aut: Laurentius Ludenius (Natalis vitae augustissimae, /.../ Christinae, /.../ Svecorum, Gothorum, Vandalorumque reginae, /.../ cum 8. die Decembris, anno Christi 1645. annum aetatis vigesimum, annumque SS. imperij secundum, /.../ auspicaretur; oratione solenni in Regia Academia Gustaviana Adolphina, quae Dorpati /.../ est /.../ aeternitati consecratus a Laurentio Ludenio, Ph. et J.U.D. poët. cor. professore juris, oratoriae et poëseos. Dorpati, 1645: J. Vogel)[1]
SKB, UUB, Växjö LB, H, [Tartu UB]
DEDICATIO
Serenissimae et Potentissimae Principi
ac Dominae,
Dei Gratia, Svecorum, Gothorum, Vandalo-
rumque Reginae, ac Principi Haereditariae; Magnae Principi
Finlandiae; Duci Esthoniae et Careliae; Dominae Ingriae; etc.
Victrici, Piae, Felici, Augustae, etc.
Vitam, Incolumitatem et Felicitatem p.p.
PATRIS, et aequaevae SOBOLIS, FLATUSque SACRATI
Annuat aeterna PACE perennis AMOR!
Est DEA dicta CHARIS, Natura mitis et Annis,
PACIS amans, Orbis deliciosa CHARIS.
Per Anagr.
CHARIS
IN REGNA IT SVECIAE.
5 Sancta CHARIS, CHRISTINA CHARIS; Regina Serena
IN REGNA IT SVEONUM deveneranda CHARIS.
Est Pater Illustris Phoenix in Prole renatus:
AdVeniat, Videat, Vincat amica CHARIS!
SS. Reg. Maj. Symbolum:
CHRISTUS REFUGIUM SUORUM.
Nam RE conFUGIUM REGINAE CHRISTUS: ab alto
10 Irradians, complens Regia Corda, VIGOR.
CHRISTUS, Numen, Honos, nitidissima Vita SUORUM:
Arctoi Regni Lux, Sator, alma Salus!
Salve, Sancta CHARIS! Salve, REGINA! IEHOVA
Auspice, sis Regni deliciosa CHARIS.
Dominae et Reginae suae Clementissimae,
Humilime.
14. Adr: Jacobus P. Columbus – Aut: Torerus Erici Odelius (Disputatio physica de mundo; quam /.../ in Regia Academia Gustaviana, quae Dorpati /.../ est /.../ sub praesidio /.../ Johannis Erici Stregnensis, /.../ disputationis examini submittit Jacobus P. Columbus, /.../ ad diem 5. <31.> Julij anno 1645 /.../. Dorpati Livonorum 1645: J. Vogel) SKB, UUB, H, [Tartu UB]
GRATULATIO
Praestanti Doctrina et Humanitate Ornatissimo Viro-Juveni,
Dn. JACOBO COLUMBO, V-gothia Svec.
Thesium de Mundo in genere Authori et Propugna-
tori solertissimo, amico et fratri suo syncere dilecto.
Gloria virtutis! didicisse fideliter artes
Est pretium, et doctis Lausque decusque viris.
Hinc cursus, JACOBE, tuos Laudoque proboque
Dum Sophiae monstras abdita dona tuae;
5 Utilis hic Labor est: hoc tu cupis utilis esse
Cui? Patriae; fies utilis, addo, tuis.
O quam gratus eris, quum fies utilis omni:
Qui fit tot meritis utilis haud moritur.
Perge igitur posthac animo hos haurire Liquores,
10 Quo facias Musis sedulitate satis.
Animitus Gratulatur
15. Adr: Jacobus P. Columbus – Aut: Laurentius E. Emzelius (cf. 14)
SKB, UUB, H, [Tartu UB]
GRATULATIO
Per Anagr.
CURTUM OPUS IBI COLEBAS.
Pulchrum OPUS hic et IBI, Musarum docte Columbe
Cultor, et Aonidum flos, dexteritate COLEBAS,
Quando longum alias OPUS, hic facis indole CURTUM,
Rite Columbino monstrans genio, ingenioque
5 Quas rerum species, numerosus porrigat orbis,
Vastaque quid vasti supportet Machina Mundi.
CURTUM OPUS, ast longum, defendere perge beatus,
Atque vige felix, claris et consule Musis.
Ita sympatriotae, et amico suo singulari
gratulari voluit
16. Adr: Andreas S. Dimbodius – Aut: Laurentius Ludenius (De humana fragilitate oratio metrica: quam, in Regia Academia Gustaviana Adolphina, quae Dorpati /.../ est /.../ die 13. Martij an. 1645. /.../ publice /.../ enarrabat Andreas S. Dimbodius, /.../. Dorpati, 1645: J. Vogel) SKB, UUB, Växjö LB, H, [Tartu UB]
GRATULATIO
Doctiss. et Ornatiss. Dn. Peroranti.
Per Anagr.
MI DEUS, BONIS ADDAR.
Cum nil sit firmum, aut stabili munimine tutum;
Vsque BONIS ADDAR, MI DEVS alme, precor.
In felix omen app.
Laurentius Ludenius, Ph. et J.U.D.
Poët. Cor. P.P.
17. Adr: Andreas S. Dimbodius – Aut: Ericus Andreae Holstenius (cf. 16)
SKB, UUB, Växjö LB, H, [Tartu UB]
GRATULATIO
Noscere, quam nostrae fragilis sit portio vitae,
Et queis exposita hic, sorte premente, malis!
Est opus egregium; Fateor. Nam gnîti seautÒn
De coelo illapsum mentibus esse reor.
5 Id tua, nos Clariae, DIMBODI docte, Camoenae
Ingenuo metro verba ligata docent.
Gratulor ipse tuis conatibus, atque Jehovae
In Laudem vergant, voce rogante precor.
T°w filÛaw §neka ¦gracen
18. Adr: Andreas S. Dimbodius – Aut: Jacobus Columbus (cf. 16)
SKB, UUB, Växjö LB, H, [Tartu UB]
GRATULATIO
Cephisi tumidae ceu fugiunt aquae
Parvo murmure, sed non regredi queunt:
Sic transit subita vi
Nostrorum vigor artuum,
5 Et nunquam viridi flore redit; sed ut
Consurgunt roseo florida pectine
Primo gramina, deinde
Illis totus honor perit:
Sic paulatim et homo langvidus horrido
10 Flaccescit senio; mox Lachesis fera
Tristi sauciat arcu,
Totus corruit et cadit!
Dum Lucina vocat Matris ab anxiae
Nos alvo, lacrymis cernimus aetheris
15 Auras, atque vicissim
In tristis gremium soli
Parcae quando vocant, nos lachrymas graves
Sentimus. Breve quod vivimus anxie
Tempus, maxima vexat
20 Tempestas, dolor, et labor.
Flos, et bulla cadens nos miseri sumus!
Ventus, qui breviter murmurat, et perit!
Nix, quae Solis ab aestu
Udos in latices fluit.
25 Cur ergo putridum magnifice caput
Ostentas homo? Junonis ut alites
Conspectis pedibus, cur
Non alas tumidas premis?
Haec et plura canis carmine vivido,
30 DIMBODI, Clarij candida pars Chori:
Dum dulces tibi succos
Donant Pieriae Deae,
Humanum graphice pingere queis statum
Vires ingenij fluminis in modum
35 Possunt. Perge Camoenas
Toto pectore prosequi:
Hae cum Castalios possideant lacus,
Syncerae juvenes queis cupidos rigant
Doctrinae, minus aevum
40 Perget Nomina tollere.
Scripsit
Gen. et Illust. Gub. Rig. Stip.
S.S. Theol. Stud.
19. Adr: Andreas S. Dimbodius – Aut: Jonas Johannis Scarensis (cf. 16)
SKB, UUB, Växjö LB, H, [Tartu UB]
GRATULATIO
Labilis humanos rotat inconstantia casus,
Nec didicit certo fallax Rhamnusia stare
Gressu; dum laeto nobis modo lumine fulget,
Ast modo splendentem tentat subducere vultum!
5 Est variis subjectus homo (proh flebile) morbis;
Nec tamen hi morti cunctos occumbere cogunt:
Sed partim, Vulcane, voras, Thetis horrida partim
Submergis; duro vel sternis vulnere, Mavors!
Hoc tamen immotum cunctis e femine natis,
10 Seu sint ex nihilo, restat: Semel horrida mortis
Castra subire jubet Divinae Regula Legis.
Talia qui volvit, syncera est Laude vehendus;
Et Tu dum varios numeroso carmine vitae
Humanae casus expendis, docta Noveni
15 Pars Gregis, et nostri, DIMBODI, portio coetus;
Te pulcrae merito Laudis dignamur honore.
Gratulabundus adjecit
Westro-Gothus.
20. Adr: Johannes Andreae Gadd – Aut: Laurentius Ludenius (De vera Dei invocatione oratio: quam, /.../ in Regia Academia Gustaviana Adolphina, quae Dorpati /.../ est /.../ 3. die Junij anno 1645. publice /.../ enarrabat Johannes Andreae Gadd, /.../. Dorpati 1645: J. Vogel) SKB, UUB, Växjö LB, [Tartu UB]
GRATULATIO
Doctiss. et Ornatiss. Dn. Peroranti.
Per Anag.
AGNINA, DEO ADHAERENS.
Mens AGNINA, DEO precibus constanter ADHAERENS,
Pneumatica sanctas concinit arte preces.
In felix omen ap.
Laurentius Ludenius, Ph. et J.U.D.
Profess. Publ.
21. Adr: Johannes Andreae Gadd – Aut: Petrus Caroli Undenius (cf. 20)
SKB, UUB, Växjö LB, [Tartu UB]
GRATULATIO
Optimum opus manuum est, in coelum tendere puras,
Atque pio castas fundere ab ore preces.
Turbati erigimus, Deus, ad te lumina cordis,
Vsque Creatori concinimusque preces.
5 In Precibus toto nostrum cole pectore Christum,
Ille tui merces magna laboris erit.
Haec synceri animi declarandi causa
apposuit
W-Goth. SS. Theol. Stud.
22. Adr: Johannes Andreae Gadd – Aut: Sigvardus Wallingh (cf. 20)
SKB, UUB, Växjö LB, [Tartu UB]
GRATULATIO
Assidue volvens Sacri Mysteria Verbi,
Et recitans vigili sedulitate Preces;
Illius merito Nomen celebratur in orbe,
Atque idem placat voce precante Deum.
5 Iane, tibi merito ferimus praeconia laudum,
Biblia amas, monstras voce rogare Deum.
Perge, velut pergis, Sacra dogmata volvere sancte;
Charus eris Musis, deliciumque tuis.
Syncerioris affectus contestandi causa
adjecit
23. Adr: Johannes Andreae Gadd – Aut: Jonas Johannis Scarensis (cf. 20)
SKB, UUB, Växjö LB, [Tartu UB]
GRATULATIO
Inclyta qui Themidos lustrat sacraria Divae,
Strenuitate pia;
Langvida morbifera ac qui corpora tabe, medendi
Arte levare studet;
5 Nec non qui Sophiae Studiis, caligine mentem
Exuit atque polit;
Eximia laude est dignus; magnae quia praestat
Dexteritatis opus;
Sed qui Divini volvit Sacra Dogmata Verbi
10 Anteferendus erit.
Omnia cum veluti vestis detrita peribunt
Stant rata Verba Dei;
Hinc et Musarum Sectator, docte JOHANNES,
Aonidumque decus,
15 Laude tui genij merita celebrabimus ausus,
Gutture svaviloquo
Dum narras, summus Dominus qua sollicitandus
Supplice voce Precum.
Annuat Astripotens coeptis: nec pergere cesses,
20 Pulcra brabeja feres.
Non tam moris quam amoris
ergo, appendit
24. Adr: Johannes Andreae Gadd – Aut: Laurentius E. Emzelius (cf. 20)
SKB, UUB, Växjö LB, [Tartu UB]
GRATULATIO
Sedulus in sacris operam qui collocat aptam,
Hic Bene profecit, consuluitque sibi.
Vraniae Soboles, quid vera vocatio Christi,
Rite docens; studiis consulis ipse tuis.
5 Perge; mone felix, quid vera vocatio Christi;
Alma Trias coeptis his faveatque Sacris.
Quod ex fraterni animi affectu vovebat
W. Goth. SS. Theol. Stud.
25. Adr: Johannes Andreae Gadd – Aut: Andreas Helgonius (cf. 20)
SKB, UUB, Växjö LB, [Tartu UB]
GRATULATIO
Quae complectuntur Stellata Palatia coeli;
Quaeque suis tellus tractibus ampla tenet;
Totaque Naturae meditantur moenia laudes
Numinis aeterni, ut pagina sacra docet.
5 Judicij trutina hoc perpendis, Docte JOHANNES,
Dum sacra repetis sedulitate Preces.
Insta, Insta Precibus, coeptum nec sistito gressum;
Ex alto largam det tibi Summus opem.
Sympatriotae et Amico suo dilecto
ita gratulari voluit
26. Adr: Johannes Georgii Gezelius – Aut: Laurentius Ludenius (Sceptris academicis, quae /.../ in magnificum p. t. rectorem /.../ Iohannem Georgii Gezelium, in Regia Academia Gustaviana Adolphina, quae Dorpati /.../ est /.../ Graecae et Hebraeae linguae profess. ord. nec non proto-synedrij designatum adsessorem, /.../ magnificus p. t. ex-rector /.../ Salomon Matthiae SS. theol. profess. et ecclesiae, quae ad D. Johannis colligitur, pastor /.../ publice solenniterque die 3. Novemb. anno 1645. /.../ conferebat: quaevis /.../ precantur Musae Embecciades. Dorpati Livonorum 1645: J. Vogel) H SKSK, [H], [Tartu UB]
GRATULATIO
Per Anag. duplex;
1. HOMINIS ZELO EGREGIA JUNGES:
2. EGREGII HOMINIS ZELO AUGENS.
Candide GEZELI, meritis Collega verende,
Delicium cultae Eusebiae, Sophiaeque Magister;
Magnifici felix venerandas muneris hujus
Suscipe delicias: mihi Magnifice inclyte, Salve.
5 Sancto HOMINIS ZELO, Christi auspiciisque beatis,
EGREGIA egregie JUNGES Academica Sceptra;
EGREGIIque HOMINIS ZELO feliciter AUGENS,
Imperium Musis, animos aequaveris aevo.
In felix Auspicium
Honorando suo Dn. Collegae sc.
Laurentius Ludenius, Ph. et J.U.D.
Poët. Cor. Prof. Publ.
27. Adr: Johannes Georgii Gezelius – Aut: Johannes Erici Stregnensis (cf. 26)
H SKSK, [H], [Tartu UB]
GRATULATIO
O mihi de patriis longe gratissime terris,
GEZELI, Clarij pars speciosa chori:
Magnificos dum Matthiades dimittit honores,
Officiique pius nobile ponit onus;
5 Magnificos placidis animis admittis honores;
Magnifici officij nobile sumis onus.
Felix GEZELI, qui, nostro praeside Christo,
Magnifici officij tam bene sumis onus!
Honoris ergo apposuit
Astronom. et Phys. Prof. P.
28. Adr: Johannes Georgii Gezelius – Aut: Adrianus Verginius (cf. 26)
H SKSK, [H], [Tartu UB]
GRATULATIO
In summo doctae Parnassi vertice montis
Musae conveniunt, celebrantes annua festa:
Magnanimae cantat Clio rata fata Minervae,
Laudibus innumeris Polymneia mactat eandem.
5 Blanda Thalia vetat non-dignam, morte moriri;
Casta Erato castos ejus modulatur amores.
Uraniae genesin scrutatur; et, astra beatae
Multum promittunt, exclamat laeta, salutis.
Hinc reliquae capiunt laeto nova gaudia vultu;
10 Phoebus et eligitur per libera vota Choragus,
Purpureaque ejus velantur Epomide membra.
Calliope sequitur, jucundam pectore vocem
Fundens; Euterpes auditur fistula; cunctas
Vincere Melpomene cantus dulcedine tentat.
15 Terpsichore pulsat citharas; ex arte choreae
Ducuntur; manibus complosis Jubila dantur.
Da Deus, infelix ne quis pia gaudia casus
Turbet! clementer nostrum servato Choragum,
Servato et nostras Musas, nostramque Minervam,
20 Quae Musis nostris haec gaudia et otia fecit.
Ita ex toto corde vovet
Adrianus Verginius, Julino-Pom.
Ecclesiae Nuggensis Pastor, et Facult.
Theol. Adjunctus.
29. Adr: Johannes Georgii Gezelius – Aut: Benedictus Cassiander (cf. 26)
H SKSK, [H], [Tartu UB]
GRATULATIO
Phoebi Cultores, adsitis jugiter omnes;
Et pateant aures, ad mea verba, precor.
Omnibus est notum; Redit lux illa Novembris,
Magnificum accipiet qua sacer ordo novum.
5 Magnificus Rector SALOMON Pia Sceptra Lycei
Ponit: Magnifico GEZELIOque refert.
Muneris est nostri, SALOMONI solvere grates,
Pro pietate proba, pro Probitate pia.
Munus erit nostrum Rectori fausta futuro
10 Optare; Ah, cedant candida Sceptra bene!
Observantiae contestandae gratia posuit
30. Adr: Johannes Georgii Gezelius – Aut: Andreas Berg (cf. 26)
H SKSK, [H], [Tartu UB]
GRATULATIO
Per ¢nagr.
I, MAGNE GEZELI, I! SURGE HONOS.
I tu, MAGNE Vir, I felix! fer fulgida Sceptra,
GEZELI; Musae SURGE virentis HONOS.
TÁj qerape…aj›neken œgrayen
Wesman.
31. Adr: Johannes Georgii Gezelius – Aut: Ericus Holstenius (cf. 26)
H SKSK, [H], [Tartu UB]
GRATULATIO
Narravit Naso; Parnassi montis Alumnus;
Numina cultori Perniciosa suo.
Dixerit. Ast video, variatis sortibus aevi,
Diversi enatum temporis ingenium.
5 Musae Embecciades certatim his munera portant,
Qui Clariis pergunt invigilare Choris.
Testis GEZELIVS, sancti veneranda Lycei
Gloria; Promotor, Deliciumque meum.
Multa tulit, fecitque: animis sudavit et alsit:
10 Arte Magister adest, Arte Professor adest.
Purpura clara Virum jam cingit, et ornat amictus,
Magnificumque suum tota Corona vocat.
Osi, Magnifici Gnati, Genitoris ocelli
Aspicerent, clarum dexteritate decus!
15 Invida sed prohibes longi distantia tractus,
Optatum nostrum fluminaque impediunt.
Interea i felix, rege nos, Deus acta secundet
Et tangat celsum fama beata polum.
Honorando suo Dn. Hospiti, ita ani-
mitus gratulatur
Wesman.
32. Adr: Johannes Georgii Gezelius – Aut: Carolus Ruberus (cf. 26)
H SKSK, [H], [Tartu UB]
GRATULATIO
Qvid rauco campanarum clangore notatur
Et quid purpureo vult tegmine tecta cathedra?
Quid vult clarorum conventus in urbe Virorum?
Scilicet incedit jam cultior ille Magister
5 Noster GEZELIVS: tacitam cum consulo mentem
Causa latere nequit: quia Sceptra regenda Lycei
Pulchra dabuntur ei, cum fulserit undecima hora.
Christe fave, ut vigeat sub Sceptris blandula Musa!
Debitae observantiae causa
scribebat
33. Adr: Johannes Georgii Gezelius – Aut: Jacobus Columbus (cf. 26)
H SKSK, [H], [Tartu UB]
GRATULATIO
En ego, qui nuper carmen lugubre notavi,
Dum data GEZELIUM fata tulere Petrum!
Nunc tibi GEZELI triplicem gratabor honorem,
Quo tua te Virtus condecorare parat.
5 Sit tibi faustus honor, sit prosperitate beatus,
Dum capis Aonio Sceptra sacrata Choro.
Sit tibi faustus honor, sit prosperitate beatus,
Quando Adsessoris munia pulcra subis.
Sit tibi faustus honor, sit prosperitate beatus,
10 Summi quando Dei Praeco fidelis eris.
Sic juvat egregias caput excoluisse per Artes,
Veraque sic Virtus praemia ferre solet.
Ita Promotori suo unice suspiciendo
vovet
34. Adr: Johannes Georgii Gezelius – Aut: Wolmarus Stackelberg (cf. 26)
H SKSK, [H], [Tartu UB]
GRATULATIO
Ob vilem causam susceptas sponte querelas,
Principe Coccejo, Romae, dum quisque movebat;
Indeque surgebat discordis factio plebis;
Sed dixisse ferunt Frontonem, munere Patris
5 Conscripti tunc fungentem: Rex est Malus ille,
Sub quo non ulli, quod vult, praestare licebit;
Sed multo peior, sub quo omnibus omne licebit.
Civibus Aoniis, audis, Clarissime, Rector!
Ut nihil omnino liceat, nolito studere;
10 Vt, quodcunque lubet, liceat, nolito studere;
Sed bona, honesta, Bona pateant, justissima justis,
Hinc meritae specimen portabis nobile laudis.
Observantiae contestandae ergo sc.
Nob. Liv.
35. Adr: Johannes Georgii Gezelius – Aut: Georgius Stackelberg (cf. 26)
H SKSK, [H], [Tartu UB]
GRATULATIO
Ut virides herbas, frondes, et gramina prati,
Hortorum et flores, crescere nemo videt;
Sed crevisse patet cunctis, qui lumine cernunt,
Esse solo flores, arboribusque comas:
5 Factaque sic potius Prudentia cernitur omni,
Quam fieri. Extemplo GEZELIUM accipimus:
Rectorem factum Clariis amplectitur ulnis
Pubes, et Sophiae gaudet habere decus.
Faxit cunctipotens Dominus, qui sidera torquet,
10 Vt bene fungatur munere Magnifico.
Ita exoptat
Georgius Stackelberg / Nob. Liv.
36. Adr: Johannes Georgii Gezelius – Aut: Israel Drysander (cf. 26)
H SKSK, [H], [Tartu UB]
GRATULATIO
Svavi, vos Musae, nova carmina jungite plausu,
Ecce novo vobis Rector honore venit.
Dicite GEZELIO, resonetque in vallibus Echo,
Cum sene dic juvenis; Gratus honore venis.
5 Dicite GEZELIO; blateretque in vallibus Echo
Sit tibi faustus honos, et rege rite Bonos.
Dicite GEZELIO, sit murmur et inter amoenas
Musas: o Salve, prospera Sceptra gere.
Applaudens cecinit
Wesmannus.
37. Adr: Johannes Georgii Gezelius – Aut: Lucas Ilianus (cf. 26)
H SKSK, [H], [Tartu UB]
GRATULATIO
Felix, qui primi partes ita transigit aevi,
Vt certum speret fructum maturior aetas.
Magnifice o Rector, Sophiae Eusebiaeque Sacerdos:
Tu transegisti primum feliciter aevum.
5 Vixisti Hebraeae, Grajae, Latiaeque Minervae
Egregio in Studio. Mens et quod celsa Platonis
Narraret; totis didicisti viribus olim.
Vidit, et ut vidit: dixit Divinus Apollo,
Fructus erit: Sophiae celebrabitur Arte Magister:
10 Audiet Hebraeae Lingvae, Grajaeque Professor.
Vidit; et ut vidit Divinae mentis acumen
Atque indefessum studium, sacer ordo Senatus,
Dixit: Magnificus, GEZELIVS ille, futurus
Est noster. Jussu GVSTAVI Regis ADOLPHI,
15 Sceptra, Librum, Claves, et cuncta Insignia gestet,
Quo Clario, clarus ceu Ductor, fulgeat orbi.
Magnificus Rector vivat; Gentemque togatam
Et sanctas foveat Musas in pace perenni.
Honoris et observantiae E.
scribebat
38. Adr: Johannes Georgii Gezelius – Aut: Petrus Angelstadius (cf. 26)
H SKSK, [H], [Tartu UB]
GRATULATIO
Per Anag.
GEZELI, SANO OMNI I EGREGIUS.
Inclyte, Magnifici Rectoris munus obibis,
GEZELI; Ito OMNI SANO per secla[2] dierum
EGREGIVS; radians Musarum vivito lumen.
Debitae observantiae E. app.
39. Adr: Johannes Georgii Gezelius – Aut: Tholetus Arvikander (cf. 26)
H SKSK, [H], [Tartu UB]
GRATULATIO
En quoties redeunt pulcherrima festa Novembris,
Rector Rectori dat sacra Sceptra novo.
Sceptra dat: et comitatur onus pia Sceptra laboris,
Concomitatur item deliciosus honos.
5 Magnifice o Rector GEZELI, Sceptra reportas;
Grande laboris onus, dulcior Artis honos!
Sic novo Magnifico Dn. Rectori
gratulari voluit
40. Adr: Johannes Georgii Gezelius – Aut: Alexander von Essen (cf. 26)
H SKSK, [H], [Tartu UB]
GRATULATIO
En, novus excelso prodit praecinctus honore,
Magnifico Rector nomine GEZELIUS!
Sint hujus partes faustae, bene tractet et Artes
Ut fructum capiat quilibet inde suum.
Honoris et amoris ergo haec apposuit
Junior, Nobil. Livon.
41. Adr: Johannes Georgii Gezelius – Aut: Guilhelmus Cronmann (cf. 26)
H SKSK, [H], [Tartu UB]
GRATULATIO
Qvod viatori solet esse, purus
Fons aquae solis calido sub aestu:
Sermo Prudentum Clariae juventae
Id solet esse.
5 Hem! lubens fasces cape jam Lycei
Regij, et mentes bibulas Juventae,
Rore doctrinae refove salubris,
Clare Magister.
Sic reportabis decus atque honorem,
10 Mortuum qui te faciet perennem;
Jam silet nemo, neque te futura
Fama silebit.
Nobil. Liv.
42. Adr: Johannes Georgii Gezelius – Aut: Johannes Cronmann (cf. 26)
H SKSK, [H], [Tartu UB]
GRATULATIO
Artes nutrit Honos; praeclarae est indolis esca
Gloria, quam nutrit nominis integritas.
Hoc probat exemplo Rector, qui sceptra Magistri
Tractat, et hunc sequitur Gloria, Laus et Honor.
Junior, Nobil. Livon.
43. Adr: Johannes Georgii Gezelius – Aut: Ericus Michaelis Langius (cf. 26)
H SKSK, [H], [Tartu UB]
GRATULATIO
O faustum rebusque actum felicibus omen,
Ipse ratum e coelo quod Deus esse velit!
En tibi Dorpati sua tradunt sceptra Camoenae,
Et te Magnificum voce salutat opus.
5 His sceptris Rector felicibus utere felix,
Nec parcas, Musae multiplicare decus.
Innocuos defende libens, compesce nocentes,
Sit memor officij te Duce quisque sui.
Felicis ominis et debitae observantiae
causa app.
44. Adr: Johannes Georgii Gezelius – Aut: Laurentius Wallerius (cf. 26)
H SKSK, [H], [Tartu UB]
GRATULATIO
Aggrederis nostri dum sceptra regenda Lycei
Sudorique capis debita dona tuo:
Gratulor ex ima synceri pectoris arca:
Et precor officio plurima fausta tuo.
5 Sis felix, et vive diu, bene Vive Lyceo,
Et tua post mortem fama superstes erit.
Ita gratulatur
45. Adr: Johannes Georgii Gezelius – Aut: Ericus Colmodinus (cf. 26)
H SKSK, [H], [Tartu UB]
GRATULATIO
Prospera Lux oritur; qua Titan candida spargit
Lumina, praeteritos placide renovatque Triumphos.
Scilicet, Eusebiae flos, atque corona Sophorum
GEZELIUS, Ty<...> tectus, Sceptroque verendus
5 Almis incedit Juvenum comitante Caterva,
Accipiat laetis animis, quae Sceptra regenda
Committit Pietas, et quaevis commoda spondet,
Annuat Omnipotens, et Coepta secundet amica:
Mercurij Soboles pulcherrima fata precatur;
10 Vivat, et o Valeat praeclaro dignus honore
Magnificus Rector, Clarij pia gloria coetus.
Suderm.
46. Adr: Johannes Georgii Gezelius – Aut: Benedictus O. Vegrelius (cf. 26)
H SKSK, [H], [Tartu UB]
GRATULATIO
Gaude Thespiadum Pubes; ad Sceptra vocatur
Vir Sophia insignis, nulli Pietate secundus,
GEZELIVS; qui ne rata commoda <ne>gligat ulla
Sed res, et gentis subjectae commoda curet;
5 Tu Deus Alme juva; susceptum ita dirige munus
Vt pulcre aeternum lucescat gloria Christi.
Observantiae ergo app.
47. Adr: Gustav Adolph – Aut: Laurentius Ludenius (Natalis vitae augustissimae, /.../ Christinae, /.../ Svecorum, Gothorum, Vandalorumque reginae, /.../ cum 8. die Decembris, anno Christi 1645. annum aetatis vigesimum, annumque SS. imperij secundum, /.../ auspicaretur; oratione solenni in Regia Academia Gustaviana Adolphina, quae Dorpati /.../ est /.../ aeternitati consecratus a Laurentio Ludenio, Ph. et J.U.D. poët. cor. professore juris, oratoriae et poëseos. Dorpati, 1645: J. Vogel) [3]
SKB, UUB, Växjö LB, H, [Tartu UB]
DEDICATIO
REX
ADOLPHUS.
Per Anagramma;
REX
AUGUSTUS
HAS DVPLO.
SS. Reg. Maj. tis Symbolum:
CUM DEO ET VICTRICIBUS ARMIS.
Gratia, Christe, tua est; Patriae Civemque Patremque
Quod gero, res Sancti curo quod Imperij.
Gratia, Christe, tua est; quod Res Victricibus Armis
HAS REX AVGVSTVS conduplicando DVPLO.
5 Christo Dante, mea Phoenix in Prole renatus
Vivo: Deo Vivat Regia Progenies!
48. Adr: Georgius Johannis Hornich – Aut: Johannes Henrici (In octo libros Physic. Aristot. perˆ tÁj fusikÁj ¢kro£sewj, sive de naturali auscultatione disputatio vigesima prima, continens nobiliores notas et quaestiones cap. 2. lib. 3. a text. 6. usque ad finem capituli. Quam in Regia Academia Dorpatensi /.../ proponit et publicae disputationi subjicit /.../ Johannes Erici Stregnensis, /.../ respondente Geogio Joh. Horningk /.../ die <…> Mart. 1645. /.../. Dorpati Livonorum, 1645:J. Vogelius) UUB, H, [Tartu UB]
GRATULATIO
Semper in assiduo motu res quaeque feruntur,
Tenduntque ad melius transitione sua.
Cernimus ut sursum flammae librentur et ignes;
Cognatae u<t> terrae pondera, ad ima ruant.
5 Tuque GEORGI HORNICH, Musarum candida Proles,
Volveris ingenij candidiore via.
Naturam motus monstras; et mente sagaci
Solvis contortis dicta vibrata plicis.
Perge, velut pergis, pervolvere scripta Sophorum,
10 Sicelides Musae nomen ad astra ferent.
Honoris et amoris ergo app.
Nöttub. Carelius.
49. Adr: Georgius Johannis Hornich – Aut: Johannes J. Skytt (cf. 48)
UUB, H, [Tartu UB]
GRATULATIO
Corpora quae gremio sinuosus continet orbis,
Excercent motus singula rite suos:
Scilicet obliquum servant laquearia coeli
Motum; directum mundi Elementa tenent:
5 Compositum semper retinent animantia terrae,
Optatae et vitae munera quaeque trahunt.
Tuque GEORGI HORNICH, mi dilectissime Amice,
Ingenij motu pergis adusque tui.
Naturam motus monstras, dictante Minerva,
10 Praeside sub claro solvis in Arte strophas;
Perge piis coeptis: Musarum visere castra
Insta; sic studium Numina sancta beant.
Sic Conterraneo suo gratulatur
Kexholmensis.
50. Adr: Lucas Ilianus – Aut: Laurentius Ludenius (De elocutione disputatio rhetorica; quae, /.../ in alma Universitate Gustaviana Adolphina, quae Dorpati /.../ est /.../ die 8. Octobris anno 1645. /.../ disputationis exercitio publice /.../ committebatur, praeside Laurentio Ludenio, /.../ respondente Luca Iliano, /.../. Dorpati Livonorum, 1645: J. Vogel) SKB, UUB, H, [Tartu UB]
GRATULATIO
Doctiss. et Humaniss. Dn. Respondenti.
Per Anag.
I, AC SIS LUNULA!
J pius, AC doctae SIS lucida LVNULA Musae!
In felix omen ap.
Laurentius Ludenius, Ph. et J.U.D.
Profess. Publ.
51.Adr: Lucas Ilianus – Aut: Ericus Holstenius (cf. 50)
SKB, UUB, H, [Tartu UB]
GRATULATIO
Quod praestat svavi modulamine Tullius oris,
Mellitis labris quodque Thalia sonat;
Docte ILIANE, Choro Cathedra proponis ab alta,
Contortis solvis dicta vibrata plicis.
5 Sic LUCA, Lucere tuis bene perge Camoenis;
Augurium dico; Lucis o instar eris!
Ita Amico et Populari L. Mque
applausit
Wesm.
52. Adr: Lucas Ilianus – Aut: Laurentius Ludenius (Disputatio theologica in caput duodecimum a v. 20. usque ad v. 37. D. evangelistae Iohannis selectissimas notas exhibens; in Regia Academia Dorpatensi publicae censurae subjicietur, praeside Andrea Virginio, /.../ respondente Luca Valentini Iliano, /.../ die <…> anni 1645. Dorpati Livonorum, 1645: J. Vogelius) SKB, Växjö LB, BRAN, [Tartu UB]
GRATULATIO
Doctiss. et Humaniss. Dn. Respondenti.
Per Anag.
I NUNC! EN ILLA SALUTIS VIA!
I NUNC ad Christum! EN VIA felix ILLA SALVTIS!
In felix ausp. app.
Laurentius Ludenius, Ph. et J.U.D.
Poët. Cor. et Prof. Pub.
53. Adr: Lucas Ilianus – Aut: Georgius Preutius (cf. 52)
SKB, Växjö LB, BRAN, [Tartu UB]
GRATULATIO
Per 'Anagram.
ALI, SANUS, LUCI.
Aeternis epulis tu dignus ALI atque foveri:
Dogmate quum SANUS, Scriptis et voce repellas
Insanos; LUCI sic dogmatis additur ingens
Lux, honor et nomen; fausto bene sydere crescat!
Amico Amicus Amice apponebat
Georgius Preutius, Reval. Liv.
SS. Theol. Stud. et Philos. C.
54. Adr: Johannes Petri Kuuth – Aut: Andreas Bergh (Discursus politicus, de republica in genere: qui, in Regia Academia Gustaviana Adolphina, quae Dorpati /.../ est /.../ praeside /.../ Johanne Erici Stregnensi, /.../ publicae ventilationi committebatur a Johanne Petri Kuuth, /.../ ad diem < > Decemb. /.../. Dorpati Livonorum, 1645: J. Vogelius) UUB, [Tartu UB]
GRATULATIO
Vertere, perdulce est, sacrata volumina Phoebi, et
Pieridum dulci labra rigare vado.
Hincce favor crescit Regumque, Deumque, Hominumque;
Hinc honor, hinc nomen surgit ad astra poli.
5 Crescit et hinc ingens multarum copia rerum;
Nunquam deficiet commodus usus opum.
KUUTHIUS haec aequo jam secum pectore volvit,
Atque sofîn flores nocte dieque legit.
Ad lychnum vigilat, concinnat, publicat, edit,
10 Defendit docta dexteritate Theses.
Ominor hinc laetus; Christo Duce et Auspice, surget
Lucida stella polo, lucida stella solo.
Ita commensali suo charissimo L. Mque
gratulari voluit
Wesman.
55. Adr: Ericus M. Langius – Aut: Laurentius Ludenius (Disputatio theologica in caput undecimum a v. 1. usque ad v. 17, D. evangelistae Iohannis selectissimas notas exhibens, in Regia Academia Dorpatensi publicae censurae subjicietur, praeside Andrea Virginio, /.../ respondente Erico M. Langio, /.../ die 13. Junij anni 1645. Dorpati Livonorum, 1645:J. Vogelius)
Kobenhavn KB, BRAN, Växjö LB, [Tartu UB]
GRATULATIO
Doctiss. et Ornatiss. Dn. Respondenti.
Per Anag.
HUMILIS AC ANGELICUS ERIS.
Annuat Omnipotens: Anagrammata candida dicunt:
HVMILIS AC ANGELICVS ERIS, es.
In felix Omen app.
Laurentius Ludenius, Ph. et J.U.D.
Poët. Cor. Profess. Publ.
56. Adr: Ericus M. Langius – Aut: Georgius M. Langius (cf. 57)
Kobenhavn KB, BRAN, Växjö LB, [Tartu UB]
GRATULATIO
Mors, Pio erit non mors; sed Somnus. LaZarus illud
Testatur, cujus mors modo somnus erat.
Fata sui fratris flent, Martha, Maria, sorores,
Et serae morti succubuisse putant:
5 Verum condiderat nictantia lumina somno,
A Christo in vitam mox revocatus ovat.
Christe juva, ut memores lethi mortisque futurae
Simus; et, ut solum te veneremur, age.
Sic nobis mors, non fuerit mors; somnus amicus
10 Mors erit: aeternum, Te duce, vita redit.
Et tu, Perge, precor, felix, Duce et Auspice Christo;
Sic tibi, mi Frater, surget honore decus.
Fratri Germano fraterne adjecit
Revaliensis.
57. Adr: Samuel Olai Löfwing – Aut: Laurentius Ludenius (In octo libros Physic. Aristot. perˆ tÁj fusikÁj ¢kro£sewj, sive de naturali auscultatione disputatio vigesima quarta, continens nobiliores notas et quaestiones cap. 5. lib. 3. a text. 42. usque ad finem cap. quam in Regia Academia Dorpatensi /.../ proponit et publicae disputationi subjicit /.../ Johannes Erici Stregnensis, /.../ respondente Samuele Olai Löfwing /.../ die < > Aug. 1645. /.../. Dorpati Livonorum, 1645: J. Vogelius)
SKB, H, [Tartu UB]
GRATULATIO
Doctiss. et Ornatiss. Dn. Respondenti.
Per Anag.
UNA FLOS, AGE VI MOLLI.
Aura dabit FLOres doctae foecunda Minervae.
UNA FLOS, AGE VI MOLLI; Duce et Auspice Christo,
FLOridus hinc animus svavi ridebit odore.
Quod in felix omen app.
Laurentius Ludenius, Ph. et J.U.D.
Profess. Publ.
58. Adr: Samuel Olai Löfwing – Aut: Olaus Nicolai Berch (cf. 57)
SKB, H, [Tartu UB]
GRATULATIO
Spondet ut agricolis segetem flos primus in agris,
Sic quoque qualis erit prima Juventa docet:
Hic trahitur studio; populo inclarescere gaudet
Thespiadum auxilio; Pallada maxime amat;
5 Insignem alter amat famam sibi Marte parare,
Nil nisi Martis opus nocte dieque canit.
Poscit uterque sibi laudes, et uterque laborat
Ferre Jubar Patriae praesidiumque suae.
Quos spondes Patriae, SAMUEL mi, quosque Parenti
10 Dilectae fructus, hos facile ipse doces.
O faustum coeptum! Dic quidnam dulcius unquam,
Nomina quam studiis docta parare suis?
Ne cesses Viridem posthac ornare Sophiam,
Successu facili sic tibi crescet honos.
In synceri amoris tekm»rion fratri suo ita
congratulari voluit
Smoland.
59. Adr: Samuel Olai Löfwing – Aut: Petrus Angelstadius (cf. 57)
SKB, H, [Tartu UB]
GRATULATIO
Est infinitus labor infinita referre;
Finitus studium finiat, opto, labor.
Perge, ut coepisti, doctae servire Minervae;
Et studia accrescent re meliore tua.
Honoris E. app.
60. Adr: Olaus Michaelis – Aut: Laurentius Ludenius (Oratio de bello: quam, in Regia Academia Gustaviana Adolphina, quae Dorpati /.../ est /.../ 27. die Martij an. 1645. publice /.../ enarrabat Olaus Michael, /.../. Dorpati, 1645: J. Vogelius)
SKB, UUB, [Tartu UB]
GRATULATIO
Doctiss. et Ornatiss. Dn. Peroranti.
Per Anag.
MIHI SALUS CAELO.
Rara SALVS, cum praecipitant Mars iraque mentem.
Certa MIHI CAELO, Christe, parata Salus.
Quod in felix omen ap.
Laurentius Ludenius, Ph. et J.U.D.
ac Profess. Publ.
61. Adr: Olaus Michaelis – Aut: Petrus Caroli Undenius (cf. 60)
SKB, UUB, [Tartu UB]
GRATULATIO
Nobile Pierij decus, o OLAVE, Theatri;
Gnaviter exponis, bello nil noxius esse,
Quodque mage humana procul a ratione recedat,
Pro patria vero decus est profundere vitam.
5 Nam reliqui cives tali virtute regentur,
Et salvae interea matres, natique manebunt,
Qui sunt aetatis venturae semina et orbis.
Templa manent, Legesque bonae, pietasque pudorque;
Et tunc quisque suis rebus fundisque fruetur,
10 Dum pulsi fugiunt hostes in patria regna.
Gratulor hincce tibi: Deus Omnipotens precor adsit,
Vt tibi surgat honor longo durabilis aevo,
Atque favente Deo, perdulcia gaudia crescant.
Felicioris ominis ergo, Sympatriotae suo
suaviss. haec app.
W-Gothus, SS. Theol. Stud.
62. Adr: Olaus Michaelis – Aut: Sigvardus Wallingh (cf. 60) SKB, UUB, [Tartu UB]
GRATULATIO
Qvod dubio belli vis tempore Martis acerba
Christicolos vexat, rite docere studes.
Quodque homines celebri natos de sangvine tollat,
Atque rudes pariter quod tulit orbe, doces.
5 Perge diu rerum numerosa pericula narrans,
Atque tibi semen fertile, crede, feres.
Perge diu tractans digne ista, Deoque Patrique,
Ac Patriae, semen fertile, crede, feres.
63. Adr: Haquinus Platinus – Aut: Laurentius Ludenius (Disputatio theologica in caput duodecimum a v. 1. usque ad v. 20. D. evangelistae Iohannis selectissimas notas exhibens, in Regia Academia Dorpatensi publicae censurae /.../ subjicietur, praeside Andrea Virginio, /.../ respondente /.../ Haquino Platino, /.../ die < > Aug. anni 1645. Dorpati Livonorum 1645: J. Vogelius)
SKB, Växjö LB, BRAN, [Tartu UB]
GRATULATIO
Praestantiss. et Humaniss.
Dn. RESPONDENTI.
Per Anag.
QUIN MAGNIS HUMI PLATANUS?
QUIN MAGNIS ut HUMI PLATANUS sis? Praeside Christo,
Aëria aestivos PLATANUS diffundat honores.
Quod in felix omen app.
Laurentius Ludenius, Ph. et J.U.D.
Profess. Publ.
64. Adr: Haquinus Platinus – Aut: Gamaliel Bergius (cf. 63)
SKB, Växjö LB, BRAN, [Tartu UB]
GRATULATIO
Christus abest, moritur dum Lazarus: Ecce Redemptor
Christus adest; vitam Christus inire jubet.
Lazarus haud poterat Christo clamante tacere;
Surgit, et in vitam jam revocatus adest.
5 Christe juva; Duce te non mors aeterna nocebit;
Te Duce, sub medio funere vivus ero.
Delicium Eusebiae, et Sophiae dilecte Magister,
Felix, qui tantum re meditaris opus.
Gratulabundus sc.
Eccles. Laiensis Past.
65. Adr: Haquinus Platinus – Aut: Andreas Matthiae Torpensis (cf. 63)
SKB, Växjö LB, BRAN, [Tartu UB]
GRATULATIO
Si meritas possem laudes conscribere; coepto
Carmine, nunc vellem dicere laeta tibi.
Nam velut in castris Musarum degere oportet,
Hoc Clariae docta praecipis arte viae.
5 Gratulor ergo tuis coeptis; venerande Magister;
Insistas coeptis, qua decet ire via;
Huc ades, o Jesu, Pulcris bonus annue coeptis,
Sic labor hinc Studio praemia digna feret.
Moris, honoris et amoris ergo
addidit
66. Adr: Haquinus Platinus – Aut: Carolus Ruberus (cf. 63)
SKB, Växjö LB, BRAN, [Tartu UB]
GRATULATIO
Sic pia rimaris mysteria, praeside Christo,
Quae sunt aethereo rite sacrata Deo.
Apprecor aeternum Numen tua coepta secundet;
Et Platanus laeta sorte Platinus erit.
Candidi honoris ergo apponebat
67. Adr: Carolus Ruberus – Aut: Laurentius Ludenius (Disputatio physica de temperamento; quam /.../ in Regia Academia Gustaviana, quae est Dorpati /.../ ad diem 5. Julij 1645. /.../ sub praesidio /.../ Johannis Erici Stregnensis, /.../ publice ventilandum exhibet Carolus Ruberus, /.../. Dorpati Livonorum, 1645: J. Vogelius)
SKB, UUB, H, [Tartu UB]
GRATULATIO
Doctiss. et Ornatiss. Respondenti.
Per Anag.
CURSURUS ELABOR.
Fortis, et ad palmam per me CURSURVS honoris,
ELABOR: Christo concomitante, beor.
In felix omen app.
Laurentius Ludenius, Ph. et J.U.D.
Profess. Publ.
68. Adr: Carolus Ruberus – Aut: Faderus Uraelius (cf. 67) SKB, UUB, H, [Tartu UB]
GRATULATIO
Qvi Sophiae Musis, sudore operatur amico,
Ipse operam cum spe divite rite locat.
Namque ferunt Musae cultorem rebus honestis,
In campum et ponunt cum pietate virum,
5 Certe Temperiem rerum rimaris; et intras
Jam Sophiae, Christo concomitante, viam
I bene, RVBERI, meruit ceu vivida Virtus
Perge; Juvet Christus, prosperitasque beet.
Quod animitus Amico suo syncere
precatur
Smoland.
69. Adr: Carolus Ruberus – Aut: Petrus T. Loohm (cf. 67)
SKB, UUB, H, [Tartu UB]
GRATULATIO
Temperies rerum quid sit, describis, Amice
CAROLE, Delicium jugis Amicitiae.
Colligo, Temperiem cerebri tribuisse benignam,
Qui dedit ipse animam et corpora pulcra, Deus.
5 Perge piis studiis, et tramite semper eodem
Curre, tui ingenij sic bona temperies.
Amicitiae et honoris E. apposuit
haecce paucula
70. Adr: Andreas Helgonis Udbingius – Aut: Laurentius E. Emzelius (Disputatio physica de natura elementorum in genere; quam /.../ in Regia Academia Gustaviana, /.../ ad diem 3. Maji, /.../ sub praesidio /.../ Johannis Erici Stregnensis, /.../ publicae disquisitioni subjicit Andreas Helgonis Udbingius, /.../. Dorpati Livonorum 1645: J. Vogelius) SKB, UUB, [Tartu UB]
GRATULATIO
Doctrina et Humanitate conspicuo Viro Juveni,
Dn. Respondenti, Thesium harum Authori.
¢nagram.
RE DIGNA, HIS LONGE SUDANS, UBI.
Egregium facinus, DIGNA sic Re stimulante,
Praestas, HIS SUDANS, pergis UBI Physicis!
Uraniae soboles, LONGE, Udbingi, Arte recludis,
Quid valeant Genij candida signa tui.
5 Quippe doces veterum quae sint primordia rerum;
Quo tendant, quid agant singula, quidquid velint.
Gratulor incaeptis, grator successibus atque
Gratulor ingenio, quod tibi Musa dedit.
HIS SUDANS faustis decurras passibus: alma
10 Musaque ti faveat, Thespiadumque chorus.
Atque UBI rite manes, DIGNA sic RE stimulante,
HIS SUDANS, praestas nobile mentis opus.
Det Io saCra trIas CaeptIs hIs VeLa seCVnDa[4]
QVo feLIX CVrsV, tangere sCeptra qVeas.
Ita fraterni ex animi affectu gratulatur
West-Gothus, SS. Theol. Stud.
71. Adr: Godefredus Walter – Aut: Joachimus Rachelius (Dissertationum politicarum prima observationes politicas in prologum et caput 1. lib. I. L. An. Flori exhibens quam /.../ in Academia Gustaviana publico doctorum examini subjicit Andreas Sandhagen, /.../ respondente Godefredo Walter, /.../ ad diem 7. Junij /.../. Dorpati Livonorum 1645: J. Vogel) SKB, [Tartu UB]
GRATULATIO
Ad
Dn. Respondentem.
Cvm pingui caput ebrium falerno
Vix jam Pantalabus sophista tollit,
Cum Thebas duplices, decemque Lunas
Miratur simul, horridosque Faunos
5 Cum tota putat ambulare silva.
Tum quicquid sapientiae sub imo
Clusum pectore sobrium latebat
Eructat madidus feroce lingua.
Tunc ille omnia et universa novit,
10 Novit omnia et universa solus:
Quicquid Cecropij docent Pelasgi,
Quicquid Biblia Sacrosancta Mystwn
Quicquid porticus ipsa, quicquid hortus,
Quicquid in Tacitoque Julioque
15 Narrat postgenitis diserta fama,
Quicquid Livius elaborat ingens;
Quicquid Consule Romulo patratum est
Quicquid Caesare Manlio et Cethego;
Tunc ancillula quae cubile sternit
20 Admirans ait haec, manumque tollens:
Dij magni Salapusium disertum!
Sed postquam hunc Bromius furor reliquit
Tum fit Pantalabus Sophista caudex.
Verum non ita mens tibi est, Amice
25 VVALTERE, Aonij decus Lycei:
Non tu e doliolo, sed e cathedra
Cordata modo Disputatione
Authorem Latium excutis, sed illum
Doctum, Juppiter, et laboriosum!
30 Quin tute es, Gothofrede, tute doctus
(At non Juppiter) et laboriosus.
Londinensis.